‘दशैंअघि ३५ प्रतिशतलाई कोभिडविरुद्धको खोप’

नुवाकोट । स्वास्थ्य तथा जनसंख्या राज्यमन्त्री उमेश श्रेष्ठले दशैंअघि ३५ प्रतिशत जनसंख्यालाई कोभिडविरुद्धको खोप लगाइसक्ने बताउनुभएको छ ।

मन्त्री श्रेष्ठले नेपाल समाचारपत्रसँगको कुराकानीमा सरकारको पहिलो प्राथमिकता खोप रहेको उल्लेख गर्दै यो वर्षको अन्त्यसम्म सबै जनतालाई खोप उपलब्ध गराइसक्ने जानकारी दिनुभयो ।

उहाँका अनुसार उपत्यकामा ७५ प्रतिशत जनसंख्याले कोभिडविरुद्धको खोप लगाइसकेको छ । मन्त्री श्रेष्ठका अनुसार हालसम्म १ करोड ४१ लाख मात्रा खोप उपलब्त्र गराइसकिएको र दशैंसम्ममा १ करोड ६० लाख मात्रा खोप उपलब्ध गराउने योजना रहेको छ ।

उहाँले मोडर्ना र फाइजर खोप आउने सुनिश्चित भइरहेको बताउँदै अब खोपको समस्या नहुने दाबी गर्नुभयो । उहाँले २ करोड १७ लाख जनतालाई पुग्ने गरी खोपको सुनिश्चितता गरिएको उल्लेख गर्नुभयो । मन्त्री श्रेष्ठले १४ हिमाली जिल्लाका सबै नागरिकलाई खोप लगाउने काम शुरू गरिएको जिकिर गर्दै तीन महिनाभित्र हिमाली जिल्लामा खोप लगाइसक्ने बताउनुभयो ।

उहाँले दशैंलगत्तै १८ वर्षमुनिका बालबालिकाका लागि कोरोनाविरुद्धको खोप लगाउन शुरु गरिने जानकारी दिँदै त्यसका लागि १ करोड खोप आउने सुनिश्चित भइसकेको बताउनुभयो । उहाँले भन्नुभयो– ‘४० लाख मोडर्ना र ६० लाख फाइजरको खोप खरिदको व्यवस्था गरिएको छ । दशैंलगत्तै फाइजरको १ लाख खोप आउने, त्यसपछि माघ महिनासम्ममा फाइजर र मोडर्ना खोपको व्यवस्थापन हुनेछ ।’

सरकारले चालू आर्थिक वर्षको बजेटमा सबै मन्त्रालय र सरकारी निकायको अधिकांश भ्रमण भत्ता, इन्धनलगायतमा कटौती गरी खोपलाई प्राथमिकता दिएको थियो ।

हाल सरकारले जापान, भारत र चीन सरकारले उत्पादन गरेको खोपसँगै अमेरिकाको एक डोजमात्र लगाए पुग्ने जोन्सन एन्ड जोन्सन खोपको प्रयोग गरिरहेको छ । सबैभन्दा बढी चीनको भेरोसेल खोप प्रयोग भइरहेको मन्त्रालयको भनाइ छ । त्यसै गरी, भारत सरकारले उपलब्ध गराउने कोभिसिल्ड खोप पनि केही महिनाभित्र नेपाल आइपुग्ने मन्त्रालयको भनाइ छ ।

अघिल्लो सरकारका पालामा गत माघ १४ गतेबाट खोप अभियान शुरु भएको थियो । अभियान शुरु गरेको केही महिना कोभिड–१९ संक्रमितको संख्या बढेको देखिए पनि लगातार खोप लगाएपछि पछिल्लो एक महिनायता संक्रमितको संख्या औसतमा ६ सयदेखि हजारको हाराहारीमा छ ।

कोभिडविरुद्धको खोप अभियानका रूपमा सञ्चालन गरेपछि संक्रमणदर ह्वात्तै घटेको बताइएको छ ।