चट्याङ लागेर जुम्लामा ४० भेडाबाख्रा मरे

नुवाकोट । जुम्लाको गोठीचौर गाउँपालिकाको पाटनमा सोमबार राति परेको चट्याङ लागेर भेडाबाख्रा मरेका छन्।

चट्याङ लागेर ४० भेडा मरेका छन् भने १५ भेडा घाइते भएको सो गाउँपालिकाका स्थानीयवासी रामप्रकाश विकले बताए। 

गोठीचौर गाउँपालिका–४ स्थित सामुदायिक वनअन्तर्गत चिमारा लेक नजिकै डाब भन्ने ठाउँमा चट्याङ लागेर सोही वडाका नानो भण्डारीका १० भेडा मरेको तथा २ भेडा घाइते भएका छन्। यस्तै, मुनबहादुर भण्डारीका ४ भेडा मरेका, २ घाइते, मुणिप्रसाद अधिकारीका १७ मरेको, ७ घाइते र देवीप्रसाद अधिकारीका ९ भेडा मरेका र ४ घाइते भएका इलाका प्रहरी कर्यालय गुठीचौरका इञ्चार्ज कमल श्रेष्ठले बताए।  

चट्याङ लागेर भेडाबाख्रा मरेपछि करिब ६ लाख ५० हजार बराबरको क्षति भएको प्रहरीले जनाएको छ।

पाटन क्षेत्रमा परेको चट्याङबाट भेडापालक किसानको पुख्र्यौली पेशालाई नै निकै प्रभावित बनाएको गाउँपालिकाका निमित्त प्रमुख प्रशासकीय अधिकृत अम्मराज गिरीले  बताए। उनले भने, ‘यो क्षेत्रको अधिकांश स्थानीयको मुख्य आम्दानीको स्रोत भनेकै भेडापालन हो।’ 

भेडापालक किसानलाई राहतका लागि गाउँपालिकामा छलफल गरेर मात्र राहतको कुरा अघि बढ्ने निमित्त प्रमुख प्रशासकीय अधिकृत गिरीले बताए।

भेडा मरेपछि व्यावसायिक रूपमा भेडा पालेरै जीविकोपार्जन गर्दै आएका किसानलाई रोजीरोटी जुटाउन मुस्किल पर्ने गुठीचौर गाउँपालिकाका स्थानीयबासी बताउँछन्। ठूलो मात्रमा क्षति भएपछि भेडापालक किसानले राहतको माग गरेका छन्। 

जुम्लामा २०७० सालमा निरन्तर परेको असिनापानी र हावाहुरीले करिब ७०० भेडाबाख्रा मरेका थिए भने २०७७ सालमा ५०० भेडा मरेको तथ्याङ्क रहेको पशुसेवा कार्यालय जुम्लाले जनाएको छ।