विदुर नगरपालिकाका विद्यालयहरु आईतवारदेखि खुल्ने

नुवाकोट । विश्वव्यापी महामारीको रुपमा फैलिएको कोरोना भाईरस (कोभिड–१९)को कारण मुलुकभर लकडाउन घोषणा भएपछि बन्द भएका नुवाकोटको विदुर नगरपालिकाका विद्यालयहरु आईतवारदेखि खुल्ने भएका छन् ।

आगामी आईतवार २७ देखि नगरपालिकाका सवै सामुदायिक तथा निजि विद्यालयहरु संचालन हुने भएका हुन् । विदुर नगरपालिकाको बैठकले आगामी आईतवारदेखि नियमित रुपमा विद्यालय खोलेर पठनपाठन सुचारु गर्ने निणर्य गरेको हो ।

 

झण्डै ४ महिनादेखि शैक्षिक संस्थाहरु बन्द हुँदा चालु शैक्षिक सत्रनै प्रभावित बन्ने अवस्था आएको र विद्यार्थीहरुको पठनपाठनमा समेत असर पुगेका कारण आईतवारदेखि नियमित रुपमा विद्यालय संचालन गर्न लागेको विदुर नगरपालिकाका मेयर सञ्जु पण्डितले जानकारी दिए ।

आवश्यक स्वास्थ्य सुरक्षा मापदण्ड अपनाएर विद्यालय सुचारु गर्न भनेका छौ मेयर पण्डितले भने । विद्यालयले आफ्नो अवस्था हेरेर पठनपाठनलाई कसरी व्यवस्थित गर्न सक्छ सोहि अनुसार व्यवस्थापन गर्ने गरी विद्यालय खोल्ने निणर्य गरिएको उनले बताए ।

लामो समय विद्यालय बन्द भएकाले पठन पाठन प्रभावित भएको र जिल्लामा जोखिमको अवस्था पनि न्यून हुँदै गएकाले विद्यालय संचालन गर्ने निणर्य गरिएको विदुर नगरपालिकाको शिक्षा शाखा प्रमुख दिवाकर चापागाईले जानकारी दिए ।

उनले विद्यालय व्यवस्थापन समिति र शिक्षकको सहकार्यमा मास्क, सेनिटाईजर र भौतीक दुरी कायम गरेर विद्यालय खोल्न लागिएको बताए ।

जिल्लामा कोरोना संक्रमितको संख्या बढेपछि जिल्ला प्रशासन कार्यालय नुवाकोटले गत वैशाख २१ गतेदेखि जिल्लामा लकडाउन घोषणा गरेको थियो ।

त्यसपछि जेठदेखि निजि विद्यालयहरुले अनलाईन कक्षा संचालन गर्दै आएका थिए भने केहि सामुदायिक विद्यालयले अनलाईन र केहि विद्यालयहरुले टोल शिक्षा संचालन गरेर पढाउँदै आएपनि प्रभावकारी नदेखिएपछि नगरपालिकाले विद्यालयनै खोलेर पठनपाठन सुचारु गर्न आग्रह गरेको हो ।