नुवाकोटमा एकजना जनप्रतिनिधि एकीकृत समाजवादीमा

नुवाकोट । नुवाकोटमा आईतवारसम्म नेकपा (एमाले) का एक जना जनप्रतिनिधिले एकीकृत समाजवादी रोजेका छन् ।

आइतबार जिल्ला निर्वाचन कार्यालय नुवाकोटमा पुगेर उनले एमाले पार्टी छाड्दै नवगठित नेकपा (एकीकृत समाजवादी) पार्टी रोजेको बताइएको छ ।

जिल्ला निर्वाचन कार्यालय नुवाकोटका अनुसार एकजना जनप्रतिनिधिले सनाखतका गरेको भए पनि निर्वाचन आयोगको निर्देशनअनुसार विवरण बताउन नमिल्ने बताइएको छ ।

यता, नवगठित एकीकृत समाजवादी पार्टी नुवाकोटका एक नेताका अनुसार एकीकृत समाजवादी रोज्नेमा तादी गाउँपालिका वडा नम्बर ३ की वडा सदस्य रामकुमारी श्रेष्ठ रहेकी छिन् ।

सरकारले हालै ल्याएको दल विभाजनसम्बन्धी अध्यादेशमा प्रदेशसभा सदस्य र स्थानीय तहका जनप्रतिनिधिले २१ दिनसम्म विभाजनबाट बनेको दल रोज्न पाउने व्यवस्था राखिएको छ ।

निर्वाचन आयोगले दल बदल्न चाहने स्थानीय तहका जनप्रतिनिधिका लागि जिल्ला स्थित निर्वाचन कार्यालयमा २२ भदौभित्र सनाखत गराउनुपर्ने जनाएको छ ।

नुवाकोटमा अझै केही जनप्रतिनिधिहरुले एकीकृत समाजवादी रोज्ने तयारी गरेका छन् । त्यसको लागि उनीहरुले सोमवार वा मंगलवार निर्वाचन कार्यालय पुगी एकीकृत समाजवादीको पक्षमा सनाखत गर्ने बताइएको छ ।