नुवाकोटमा एमालेका जनप्रतिनिधि अझै खुलेनन् एकीकृत समाजवादीमा

नुवाकोट । निर्वाचन आयोगले एमाले र जसपाका जनप्रतिनिधिलाई दल छान्न दिएको समय सकिन अब चार दिन बाँकी छ ।

तर, आजसम्म नुवाकोटमा एमालेबाट निर्वाचित जनप्रतिनिधिहरु नेकपा (एकीकृत समाजवादी) मा खुलेका छैनन् ।

नुवाकोटका १२ स्थानीय तहमा एमालेबाट निर्वाचित जनप्रतिनिधि महिला र पुरुष गरी जम्मा एक सय ९८ जना रहेको जिल्ला निर्वाचन कार्यालय नुवाकोटले जानकारी दिएको छ । जिल्लाका १२ स्थानीय तहमध्ये तीनजना अध्यक्ष र तीनजना उपाध्यक्ष एमालेबाट निर्वाचित छन् ।

एमाले छोड्न चाहने जनप्रतिनिधिले २२ भदौ साँझ ५ बजेसम्म जिल्ला निर्वाचन कार्यालयमा सम्पर्क गर्न सूचीत गरिएको छ ।

नुवाकोटबाट निर्वाचित प्रतिनिधिसभा सदस्य नारायण प्रसाद खतिवडा र प्रदेशसभा सखस्यद्धय केशव पाण्डे र बद्री मैनाली एमालमै रहेकाले एकीकृत समाजवादी रोज्ने जनप्रतिनिधि कोही नखुलेको देखिएको छ ।

यसअघि माधव नेपाल समूहमा देखिएका एमाले जिल्ला अध्यक्ष समेत रहेका प्रतिनिधिसभाका सांसद नारायणप्रसाद खतिवडा र जिल्ला सचिव बुद्धी प्रधान एमालेमै रहने स्रोतले बताएको छ ।