नेपालले नेदरल्यान्ड्सलाई दियो २०७ रनको लक्ष्य

नुवाकोट । थ्री नेसन्स कप टी-२० क्रिकेट सिरिजअन्तर्गत नेपालले  नेदरल्यान्ड्सलाई २०७ रनको लक्ष्य प्रस्तुत गरेको छ।

कीर्तिपुरस्थित त्रिवि क्रिकेट मैदानमा जारी खेलमा कुशल भुर्तेल र दीपेन्द्रसिंह ऐरीले अर्धशतकीय पारी खेलेपछि नेपालले २०६ रन बनाएको हो। टस जितेर ब्याटिङ रोजेको नेपालले पूरै २० ओभर खेल्दै छ विकेट गुमाएर उक्त स्कोर बनाएको हो।

तीन खेलमा लगातार तेस्रो अर्धशतक पूरा गरेका भुर्तेलले  ४६ बलमा आठ चाैका र एक छक्का प्रहार गर्दै ६२ रन जोडे। यसअघि उनले सोमबार मलेसिया र शनिबार नेदरल्यान्ड्सविरुद्ध अर्धशतकीय इनिङ्स खेलेका थिए।

आजको खेलमा ऐरीले ३० बलमा पाँच छक्का र तीन चाैकासहित ६० रन बनाए। सोमपाल कामीले २१, ज्ञानेन्द्र मल्लले २०, कुशल मल्लले १८, विनोद भण्डारीले सात रन बनाए। करन केसीले एक रनमात्र जोड्दा आसिफ सेखले खाता खोल्नसमेत असफल रहे।