म पनि अनसन बस्छु

कबिता

म पनि अनसन बस्छु ,किनकी

मेरो समाचार हरेक पत्रिकाका हरेक पानामा छाउँछन्

हरेक व्यक्ति मलाई भेट्न आउँछन्

सेल्फी खिच्छन र सामाजिक सञ्जाल रंग्याउँछन् ।

म पनि अनसन बस्छु किनकी

अनसनका नाममा स्लाइनबाट भिटामिन, प्रोटिन र अन्य शक्तिबद्धक तत्व दिइन्छ

दिनै पिच्छे लाइभ अन्तर्वार्ता दिन पाइन्छ ।

म पनि अनसन बस्छु किनकी

अनसनका नाममा डलरले गोजि भर्न पाइन्छ

अनसन पछि देश विदेश शयर गर्न पाइन्छ ।

म पनि अनसन बस्छु किनकी

अत्याधिक अनसनकर्ताको नाममा रेकर्ड ब्रेक गर्नुछ

अनसनलाई राजनीतिकरण गर्नुछ ।

म पनि अनसन बस्छु किनकी

म एक्लो मान्छे अनसन बस्दा बस्दै इहलिला समाप्त भएपनि कोही टुहुरा बन्ने छैनन्

कोही बिधुवा हुने छैनन कोही रुने छैनन् ।

म पनि अनसन बस्छु किनकी म सरकारी कर्मचारी हुँ

सरकारको तलब, भत्ता खाएर सरकारको बिरुद्ध लड्ने मेरो अधिकार हो ।

त्यसैले म पनि अनसन बस्छु ।

 

        फणीन्द्र फयाल