आजबाट मौसममा सुधार

नुवाकोट । केही दिनदेखि बिग्रिरहेको मुलुकभरको मौसममा आइतबारदेखि सुधार हुँदै जाने मौसमविद्को भनाइ छ ।

अरब सागरमा विकसित भएको निसर्ग नामक शक्तिशाली चक्रवात जमिनमा प्रवेश गरेर कमजोर भई बनेको न्यून चापीय प्रणालीको प्रभावले गर्दा मुलुकभरको मौसम बदली भइरहेको छ ।निसर्ग चक्रवातको कमजोर प्रभावले न्यून चापीय प्रणाली लगभग नेपालबाट हटिसकेकाले आज आइतबारदेखि मौसममा सुधार हुँदै जाने मौसमविद् वरुण पौडेलले बताउनुभयो ।

‘केही दिनदेखि अरब सागरमा डिप डिप्रेसन थियो । त्यससँगै निसर्ग चक्रवात विकसित भयो । जसको प्रभाव हाम्रो मुलुकमा परिरहेको छ । तर, शनिबारदेखि पूर्णरूपमा यसको प्रणाली नेपालबाट हटिसकेकाले आइतबारदेखि मौसम खुल्दै जानेछ ।’ –उहाँले भन्नुभयो ।मौसम पूर्वानुमान महाशाखाका अनुसार अरब सागरमा बनेको चक्रवातका कारण बनेको मौसम प्रणाली भारत हुँदै नेपाल भित्रिएको थियो ।

आइतबारदेखि स्थानीय वायुको कारण केही ठाउँमा छिटपुट पानी परे पनि देशैभर एकैसाथ पानी पर्ने सम्भावना नरहेको पनि महाशाखाले जनाएको छ ।महाशाखाका अनुसार आइतबार देशका धेरै स्थानमा सामान्य बदली रही प्रदेश नं १, बाग्मती, गण्डकी प्रदेशका केही स्थानमा र कर्णाली, सुदूरपश्चिम प्रदेश र प्रदेश नं २ का एक÷दुई स्थानमा हल्का वर्षाको सम्भावना रहेको छ ।

त्यस्तै सोमबार देशका धेरैजसो स्थानमा सामान्य बदली रही प्रदेश नं १, बाग्मती, गण्डकी प्रदेशका केही स्थानमा र कर्णाली, सुदूरपश्चिम प्रदेश र प्रदेश–२ का एक÷दुई स्थानमा हल्का वर्षाको सम्भावना रहेको महाशाखाले भनेको छ ।