गर्भवती महिलामा कोरोना संक्रमण

हेटौंडा । हेटौंडा–१, चौकीटोलकी कोरोना संक्रमित करिब २५ वर्षीया महिलालाई चितवनको भरतपुरस्थित कोरोना विशेष अस्पताल पठाइएको छ । कोरोना संक्रमित महिलामा ५ महिनाको गर्भ रहेको बताइएको छ ।

महिलालाई कोरोना संक्रमण पुष्टि भएपछि उपचारका लागि भरतपुरस्थित कोरोना विशेष अस्पताल पठाइएको हो । संक्रमित महिलाको घर सिल गरिएको छ । उक्त नतिजापछि हेटौंडामा सुरक्षा चेकजाँच थप कडा पारिएको छ ।कोरोना संक्रमित महिला चितवनबाट हेटौंडा आएको खुलेको छ । स्थानीय एक जनप्रतिनिधिले दिएको जानकारीअनुसार उनको स्थायी घर हेटौंडा नै हो । उनी पतिसँग चितवनमा बस्दै आएकी थिइन् ।

जेठ ९ गते संक्रमित महिला र उनका पति हेटौंडा आएका थिए । स्थानीय जनप्रतिनिधिले कोरोना परीक्षण गराएर घर आउन भन्दै सोही दिन बेलुका हेटौंडा–४ स्थित श्रमिक माविमा रहेको आइसोलेसन वार्डमा पठाएका थिए । उनको कन्ट्याक्ट ट्रेसिङ सुरु गरिएको हेटौंडा–१ का अध्यक्ष सबिन न्यौपानेले जानकारी दिनुभयो । ती महिलाको हेटौंडा–१० स्थित कीटजन्य रोग अनुसन्धान तथा तालिम केन्द्रमा पीसीआर परीक्षण गर्दा रिपोर्ट पोजेटिभ आएको हो । उनलाई कोरोना पोजेटिभ देखिएपछि पतिको स्वाब संकलन गरिएको र चौकीटोलबासीलाई उच्च सतर्कता अपनाउन आग्रह गरिएको अध्यक्ष न्यौपानेले बताउनुभयो ।

ती महिला हेटौंडामा कोरोना संक्रमण देखिएकी दोस्रो व्यक्ति हुन् । यसअघि हेटौंडा–४ की करिब ५४ वर्षीया एक महिलामा कोरोना पुष्टि भएको थियो । उनको त्रिवि शिक्षण अस्पतालमा उपचार जारी छ । उनको स्वास्थ्य अबस्था सामान्य रहेको बताइएको छ ।