बागमती प्रवेश नाकामा अटोमेटिक सेनिटाइजर

हेटौंडा । कोरोना भाइरसको संक्रमण नियन्त्रणका लागि बागमती प्रदेश भित्रने यात्रुलाई हेटौंडा उपमहानगरले सेनेटाइज गर्ने व्यबस्था गरेको छ ।

शुक्रबार हेटौंडा-१५, रातोमाटेमा अटोमेटिक सेनेटाइजर मेसिनको बागमती प्रदेशका मुख्यमन्त्री डोरमणि पौडेलले सुरुवात गर्नुभएको हो । मुख्यमन्त्री पौडेलले मेसिन प्रभावकारी हुने बताउनुभयो । रातोमाटे हुँदै हेटौंडा प्रवेश गर्ने यात्रु, चालक, सहचालकलगायतलाई अनिवार्य सेनेटाइज गर्न मुख्यमन्त्री पौडेलले निर्देशन दिनुभएको छ ।

अत्यावश्यक सेवा दिनुपर्ने स्थानमा यस्तो मेसिन तत्काल जडान गरिने उहाले बताउनुभयो । एक पटकमा ४ जनालाई सेनेटाइज गर्न सकिने भए पनि भौतिक दुरी कायम गरी सेनेटाइज गरिने हेटौंडा उपमहानगरपालिकाका स्वास्थ्य प्रमुख सुपेन्द्र कार्कीले जानकारी दिनुभयो ।

नेपाल युवा उद्यमी मञ्च चितवनले उत्पादन गरेका मेसिनको २ सय लिटर क्षमता रहेको र २ हजार जनालाई सेनेटाइज गर्न सकिने जनाइएको छ । मेसिनको मूल्य एक लाख ६० हजार रहेको हेटौंडा उपमहानगरपालिकाले जनाएको छ ।