डेंगु तीव्र रुपमा फैलँदै, १ सय ४६ जनामा संक्रमण

विदुर खबर २०७७ वैशाख ५ गते १७:०६

नुवाकोट । मुलुकभर डेंगु संक्रमण फैलंदै गएको छ । देशभर १ सय ४६ जनामा डेंगु संक्रमण देखिएको ईपिडिमियोलोजी तथा रोग नियन्त्रण महाशाखाले जनाएको छ ।

रुपन्देहीमा सबैभन्दा धेरै १२ जना, काठमाडौं उपत्यकामा ३ जना तथा अन्य स्थानमा एक, दुई गर्दै संक्रमण फैलिरहेको महाशाखाको किटजन्य शाखाका प्रमुख प्रकाश प्रसाद शाहले बताउनुभयो । कोरोना भाइरसका कारण समाज आक्रान्त भएका कारण डेंगु छायाँमा परेको तर कोरोनाको महामारी रोकिने वित्तिकै डेंगुले भयावह रुप लिने भएकाले बेलैमा सचेत रहनुपर्ने डा. शाहको भनाई छ । हिजो आज ज्वरो आएका मानिसलाई कोरोनाको मात्र नभई डेंगु, मलेरिया, कालाजार, स्क्रवटाइफस जस्ता संक्रमणको समेत परिक्षण गरिनुपर्ने उहाँले बताउनुभयो ।

गत भदौमा डेंगुले महामारीको रुप लिँदा १६ बढी मानिस संक्रमित थिए । ६ जनाको ज्यान गएको थियो । लक्ड डाउनको सदुपयोग गर्दै आ आफ्नो घर वरपर पानी जमेका तथा संभावित जम्न सक्ने स्थान सफा राखेमा पनि डेंगुको संक्रमणबाट बच्न सकिने चिकित्सकीय सुझाव छ । डेंगुको संक्रमण लामखुट्टेको टोकाईबाट हुने र लामखुट्टेको विकास पानी जम्ने स्थानमा हुने भएकाले घरवर पर त्यस्ता स्थान सफा राख्नुपर्ने हुन्छ ।