कम्युनिस्ट शासन दुईदिने घाम–छायाँ : नेता पौडेल

चितवन । नेपाली कांग्रेसका वरिष्ठ नेता रामचन्द्र पौडेलले कम्युनिस्ट शासन दुई दिनको घामछाँया भएको टिप्पणी गरेका छन् ।

पूर्वी चितवनको रत्ननगरमा नेपाल पशु स्वास्थ्य सेवा प्राविधिक संघको राष्ट्रिय भेला तथा विधान अधिवेशनलाई सम्बोधन गर्दै नेता पौडेलले कम्युनिस्ट शासन जनतालाई झुक्याउने खेलमात्र भएकाले लामो समय नटिक्ने दाबी गरे ।

“कम्युनिस्ट शासन दुई दिनको घामछाँया हो, यो लामो समय टिक्दैन”, उनले भने ।

छलकपट गरेर जबरजस्ती कम्युनिस्ट शासन लाद्न खोजिएको भन्दै नेता पौडेलले वर्तमान सरकारले जनताको चाहना पूरा गर्न नसक्ने बताए । कम्युनिस्ट शासनको नाममा मुलुकमा सर्वसत्तावाद लागू गर्न खोजिएको भन्दै नेता पौडेलले त्यसलाई कांग्रेसले खुलेर विरोध गर्ने बताए ।

नेता पौडेलले केपी ओली नेतृत्वको सरकारले संवैधानिक निकायलाई कमजोर बनाएको बताए ।

संसद, सर्वोच्च अदालत, अख्तियार दुरुपयोग अनुसन्धान आयोगलगायतका संवैधानिक निकायको काममाथि हस्तक्षेप गरेर वर्तमान सरकार उनीहरुलाई कमजोर बनाउन खोजेको नेता पौडेलको आरोप लगाए । उनले भने, “भ्रष्टाचारीलाई कारबाही गर्ने निकाय नै नेताहरुसँग डराउनुपर्ने अवस्था लोकतन्त्र नभई नेतातन्त्र हाबी हुनु हो ।”

उनले भने, “सरकारले न्यायालयमा समेत हस्तक्षेप गरेको छ । अदालतले दोषीलाई कारबाही गर्न नपाउने यो कस्तो शासन हो ?”

नेता पौडेलले दुई तिहाईको दम्भ देखाएर ओली नेतृत्वको सरकारले संवैधानिक अंगलाई नियन्त्रण गरेको आरोप लगाए । “सबै डराउनुपर्ने अवस्था आएको छ । देश अब विधिको शासनभन्दा बाहिर जाँदैछ ।”

नेता पौडेलले संघीयताको कार्यान्वयनसँगै शक्ति विकेन्द्रीकरण भए पनि सरकारले नागरिकलाई त्यसको अनुभूति दिलाउन नसकेको बताए । “मुलुकमा प्रदेश सरकार गठन भइसक्दासमेत ओली नेतृत्वको सरकारले सबै शक्ति आफंैसँग राखेर अधिनायकवाद लाद्न खोजेको छ”, उनले भने ।

“कस्तो कम्युनिस्ट शासन स्थापित गराउन खोजिएको हो ? यसलाई टिकाएर देखाऊ, हामी हेर्न चाहन्छौं”, नेता पौडेलले कम्युनिस्ट शासन टिकाएर देखाउन चुनौती दिँदै भने ।

अर्को प्रसंगमा नेता पौडेलले कांग्रेस सभापति शेरबहादुर देउवा एउटा समूहको मात्र संरक्षकको रुपमा उभिएको आरोप लगाए । आफूले देउवालाई गुटको राजनीति नगर्न पटकपटक आग्रह गर्दा पनि केही नलागेको भन्दै सभापति देउवाले कांग्रेसको नाममा गुटको राजनीति गरेका कारण निर्वाचनमा कांग्रेस पराजित भएको बताए ।

सिद्धान्त अनुसारको आचरण नभएका कारण कांग्रेसले तीनै तहका निर्वाचन हार्नुपरेको धारणा नेता पौडेलको थियो ।

नेता पौडेलले कांग्रेसलाई पुरानै अवस्थामा फर्काउन कांग्रेस सच्चिनुपर्ने सुझाव दिए । उनले पार्टीलाई बलियो बनाउन न्याय, निष्पक्षता र पारदर्शिता हुन आवश्यक रहेको बताए । पाँच वर्षभित्रमा स्थितिलाई उल्ट्याउन कांग्रेसले जनताको भावनाअनुसार काम गर्नुपर्ने नेता पौडेलको भनाइ छ ।

कार्यक्रममा कांग्रेसका केन्द्रीय सदस्यहरु एनपी साउद, बद्री पाण्डे, धनराज गुरुङ, कमला पन्तलगायतले मन्तव्य राखेका थिए ।

नेपाल पशु स्वास्थ्य सेवा प्राविधिक संघका अध्यक्ष जनक रावलको अध्यक्षतामा उद्घाटन भएको अधिवेशनले संघीय ढाँचाअनुसार विधानलाई संशोधन गर्दैछ ।