रसुवागढी जलविद्युत् आयोजनाको निर्माण सुस्त

रसुवा । गोसाईँकुण्ड गाउँपालिका–२, टिमुरेमा निर्माण भइरहेको रसुवागढी जलविद्युत् आयोजनाको निर्माण कार्य सुस्त भएको छ ।

चालु आर्थिक वर्ष २०७६÷७७ भित्रै विद्युत् उत्पादन गर्ने गरी कार्य अघि बढाएकोमा अहिले निर्माण कार्य सुस्त भएको हो ।आयोजनाका अनुसार काम सुस्त हुनुमा कामदारको अभाव, टेलरेस सुरुङ निर्माणमा कठिनाइ र बाँध क्षेत्र तथा सर्ज साफ्ट क्षेत्रमा पहिरोको जोखिमका कारण काम गर्न नसक्नु हो । आयोजनाको ६ सय ६० मिटर टेलरेसमध्ये ७० मिटर क्षेत्रमा खन्ने काम भइरहेको र भौगोलिक अवस्था कमजोर भएका कारण समस्या सिर्जना भएको आयोजनाले जनाएको छ । आयोजनाको बाँध क्षेत्र तथा सर्ज साफ्ट क्षेत्रमा गत जुन २० मा आएको सुख्खा पहिरो गएको थियो । त्यसको ६ महिनापछि सो क्षेत्रमा बाटो लगिएपनि जोखिमका कारण काम अघि बढ्न नसकेको हो ।

सिभिल संरचना निर्माणको जिम्मा पाएको चाइना इन्टरनेशनल वाटर एन्ड इलेक्ट्रिक कर्पोरेसन (सिडब्लुइ) ले सुरुङ निर्माण गरेको हो । आयोजनाबाट वार्षिक ६१३.८७ गेगावाट विद्युत् उत्पादन हुन्छ । ६ वर्षअघि निर्माण सुरु भएको १११ मेगावट क्षमताको आयोजनाको ७५ प्रतिशत काम सकिएको छ । आयोजनाले उत्पादन गर्न थालेपछि दैनिक सँवा करोड आम्दानी हुनेछ । २०१७ अगस्टमा निर्माण सम्पन्न गर्ने लक्ष्य राखिएकोे आयोजना भूकम्प र नाकाबन्दीका कारण समयमा नै निर्माण सम्पन्न गर्न नसकिएको हो । तोकिएको समय सीमाभित्र निर्माण सम्पन्न नहुने भएपछि आयोजनाले समयसीमा थप गर्ने तयारी थालेको छ ।