अस्पतालमा प्रसुती गराउन आएका दुई महिलाको मृत्यु

वीरगञ्ज । वीरगञ्जको प्रभु अस्पतालमा प्रसुती गराउन आएका दुई महिलाको ज्यान गएको छ ।

ज्यान गुमाउनेमा बाराको पंचरौता नगरपालिका–१ की २५ वर्षीया सुनिता देवी र वीरगञ्ज महानगरपालिका–३ भगवती टोलकी ३० वर्षीया अमृता श्रेष्ठ रहेका छन्।डा.लक्ष्मी थापाले पुस ८ मंगलबार राति करीब ९ बजे सुनिताको शल्यक्रिया गरी प्रसुती गराएको र पुस ९ गते बुधबार विहान करीब ३ बजे सुनिताको पिसाब रोकिएको थियो ।

पिसाब रोकिएपछि डायलासिसको लागि सुनिताको आफन्तलाई सल्लाह दिइएको अस्पतालका मेडिकल डाइरेक्टर डा.अभिषेक आर्यालले बताए ।

मृतकका आफन्तका अनुसार सुनिताको पुस १० गते बुधबार राति ज्यान गएको हो । डा.थापाको लापरवाहीकै सुनिताको ज्यान गएको आफन्तले आरोप लगाएका छन् ।

त्यस्तै, अमृता पनि पुस ८ गते मंगलबारका दिन नै प्रभु अस्पतालमा भर्ना भएकी थिइन् । त्यस्तै पुस १० गते बुधबार विहान डा.थापाको शल्यक्रियाबाटै अमृताले पनि बच्चा जन्माएकी थिइन् ।

उपचार कै क्रममा बुधबार दिउँसो १२ बजे अमृताको पनि अचानक पिसाब रोकियो । अस्पतालका अनुसार औषधि दिएपछि दिउँसो २ बजे अमृताको पिसाब आयो । सोही दिन दिउँसो ४ बजे सुनितालाई भेन्टिलेटरमा राखियो ।

भेन्टिलेटरमा राखेर उपचार गर्ने क्रममा साँझ करीब छ बजे अमृताको धड्कन बन्द भयो । साँझ सवा सात बजे उनको ज्यान गयो । अस्पतालको लापरवाहीकै कारण अमृताको ज्यान गएको आफन्तहरुको आरोप छ ।

यसै विषयलाई लिएर अस्पतालकी डा.थापासँग सम्पर्क गर्न खोज्दा सम्पर्क हुन सकेन ।
डा.थापामाथि पहिले देखिनै कमिशनको भरमा औषधि चलाउने गरेको आरोप लाग्दै आएको छ ।