रसुवागढीमा चार महिनामा नै ५९ प्रतिशत राजस्व संकलन

रसुवा । रसुवागढी भन्सार कार्यालयले चालु आर्थिक वर्ष २०७६÷७७ को पहिलो चार महिनामा नै वार्षिक लक्ष्यको करिब ५९ प्रतिशत राजस्व संकलन गरेको छ ।

नाकाबाट सामग्रीको आयात तथा निर्यात बढ्दै जाँदा राजस्व संकलन पनि बढ्दै गएको कार्यालयले जनाएको छ ।पहिलो चार महिनामा नेपालीको प्रमुख चाडपर्व पर्ने भएकाले यो समयमा सामग्रीको आयात बढी हुन्छ । सिन्धुपाल्चोकको तातोपानी नाका पूर्ण रूपमा सञ्चालनमा नआएका कारण यो नाकाबाट आयात तथा निर्यात बढेको हो ।

कार्यालयका अनुसार साउनदेखि कार्तिक मसान्तसम्ममा पाँच अर्ब ४० करोड १३ लाख ८१ हजार रुपयाँ राजस्व संकलन भइसकेको छ ।कार्यालयले यो वर्ष ९ अर्ब ३५ करोड ७८ लाख ३३ हजार रुपयाँ राजस्व उठाउने लक्ष्य राखेको छ । यो लक्ष्यको तुलनामा ५८.७९ प्रतिशत हो । गत वर्ष पनि दिएको लक्ष्य अगाडि नै पूरा गरेपछि पछि लक्ष्य बढाइएको थियो ।

कार्यालयले साउनदेखि कार्तिक मसान्तसम्म ३ अर्ब ७४ करोड ३१ लाख ३१ हजार रुपयाँ राजस्व संकलन गर्ने लक्ष्य राखेको थियो । चार महिनाको लक्ष्यभन्दा ४७ प्रतिशत बढी राजस्व संकलन भएको कार्यालयले जनाएको छ ।

कार्यालयका अनुसार साउनमा ४६ करोड ७८ लाख ९१ हजार, भदौ महिनामा ९३ करोड ५७ लाख ८३ हजार, १ अर्ब ४० करोड ३६ लाख ७४ हजार र कार्तिकमा ९३ करोड ५७ लाख ८३ हजार रुपयाँ राजस्व संकलन गर्ने लक्ष्य थियो ।

जसमा साउनमा १ अर्ब ३ करोड ५ लाख ४८ हजार रुपयाँ, भदौमा १ अर्ब ५१ करोड २६ लाख ९० हजार, असोजमा १ अर्ब ३८ करोड ८० लाख ३२ हजार र कार्तिकमा १ अर्ब ४७ करोड १ लाख ११ हजार रुपयाँ संकलन गरेको हो ।

गएको चार महिनामा फलपूmल तथा चाडपर्वका सामग्री बढी आयात भएकोमा अहिले चिसोका लागि आवश्यक तयारी कपडा बढी आउन थालेको प्रमुख भन्सार अधिकृत पुण्यबिक्रम खड्काले बताए ।