आइएसआइएसको अपहरणमा परेका ३९ भारतीय कामदारको हत्या !

बीबीसी । इस्लामी आतङ्ककारी समूह आइएस आइएसले अपहरण गरेका निर्माण क्षेत्रका ३९ भारतीय कामदारको इराकमा हत्या भएको भारतले जनाएको छ । भारतीय विदेशमन्त्री सुषमा स्वराजले बताएअनुसार ३८ जना कामदारको डिएनए शवसँग मिलेपछि खबर पक्का भएको हो ।

२०१४ मा नै मोसुलमा आइएसको अपहरणमा परेको भएपनि भारत सरकारले अहिलेसम्म उनीहरु जीउँदै रहेको दाबी गर्दै आएको थियो । तर सामुहिक चिहानमा फेला परेका शवहरुसँग डिएनए मिलेपछि भने उनीहरुको पहिचान भएको बताइएको छ ।

ती सबै कामदारहरुलाई मुक्त गराउन भारत सरकारले लामो समयदेखि निरन्तर प्रयास गरिरहेको थियो ।

गतवर्ष मात्र सरकारले इराकको मद्दतले उनीहरु अझै मोसुलमै कैद रहेको पत्ता लगाएको थियो । ३९ मध्येका एक कामदारको डिएनए भने ७० प्रतिशत मात्र मिलेकाले उनको अझै पूर्ण परीक्षण हुन बाँकी रहेको स्वराजले बताएकी छन् ।

मंगलबार राज्यसभामा भाषण गर्दै गर्दा उनले यो खबर सार्वजनिक गरेकी हुन् ।

पछिल्लो वर्ष भने उनले ती कामदारहरु मारिएको कुनै प्रमाण नभेटिएकाले उनीहरु जिवित हुन सक्ने बताएकी थिइन् । अपहरित मध्ये ३१ कामदारहरु भारतको उत्तरी प्रदेश पन्जाबबाट भएको बताइएको छ भने त्यसबाहेकका कामदार हिमाञ्चल प्रदेश र बिहार अनि वेस्ट बंगालका रहेको बताइएको छ । स्वराजले उक्त समाचार सार्वजनिक गराउनासाथै सामाजिक संजालमा यसको अत्यधिक चर्चा भएको थियो ।

२०१४ मा नै भारतले आफ्ना सबै नागरिकलाई इरान जान निषेध गरिदिएको थियो र त्यहाँ भएकालाई समेत फर्काउने प्रक्रियामा रहेको थियो । भारतले विभिन्न क्षेत्रमा फसेका आफ्ना नागरिकहरुलाई मुक्त गराउन सम्झौता गर्दै आएको छ । यसअघि पनि आइएसको कब्जामा रहेका ४६ भारतीय नर्सलाई एक हप्तापछि मुक्त गराउन भारत सफल भएको थियो ।