सिसडोलको प्रभावित जग्गाको क्षतिपूर्ति दिइने

नुवाकोट । काठमाडौँ महानगरपालिकाले सिसडोल ल्याण्डफिल्ड क्षेत्रभित्र परेका जग्गाको बालीनालीको क्षतिपूर्ति दिने भएको छ। कामपाको बसेकोे ३७ औँ कार्यपालिका बैठकले सिसडोल ल्याण्डफिल्ड क्षेत्रभित्र परेका प्रभावित जग्गाको बाली क्षतिपूर्ति दिने निर्णय गरेको हो ।

दुई वर्षको लागि भन्दै विगत १३ वर्षदेखि काठमाडौँ उपत्यकाको १८ स्थानीय तहको फोहर सिसडोलमा लगिने गरेको छ । उपत्यकाबाट दैनिक एक हजार २०० मेट्रिकटन फोहर सिसडोलमा व्यवस्थापन हुँदै आएको छ । जसमा सबैभन्दा बढी कामपाबाट पाँच सय मेट्रिकटन फोहर लगिने गरिएको छ । हरेक दिन उपत्यकाबाट निजी र कामपाको गरी दुई सय गाडी फोहर लगिने गरिएको छ । कामपाका प्रमुख विद्यासुन्दर शाक्यको अध्यक्षतामा सम्पन्न बैठकले, ज्येष्ठ नागरिक तथा अपाङ्गता भएका व्यक्तिका लागि कार्यक्रम सञ्चालन व्यवस्थापन अनुगमन र नियमन सम्बन्धी कार्यविधि तयार गर्न विधायन समिति गठन गरेको छ । बैठकले शहरी योजना आयोगका सदस्यको नियुक्तिलाई अनुमोदन गरेको छ । शहरी योजना आयोग गठन तथा सञ्चालन कार्यविधि ऐनबमोजिम प्रमुखले नियुक्त गरेका आयोगका सदस्यको नियुक्ति कार्यपालिका बैठकबाट अनुमोदन गराउनुपर्ने व्यवस्था छ ।

जिन्सी निरीक्षण प्रतिवेदन २०७५ ले औल्याएका र फुटपाथ अतिक्रमण नियन्त्रण गर्ने क्रममा सङ्कलन गर्ने कपडाजन्य सामान लिलाम गर्ने निर्णय गरेको बैठकले फुटकर जिन्सी सामग्रीको दररेट समेत स्वीकृत गरेको छ । महानगरले मेलमिलाप केन्द्र स्थापना गर्न सूचीकृत गरेको मेलमिलापकर्ताको सूची बैठकले अनुमोदन गरेको छ । त्यसैगरी फोहरमैला व्यवस्थापनमा विद्यमान अभ्यास, यसका लागि लगानी बोर्डबाट गरिएका प्रयासको समीक्षा गर्दै बैठकले महानगरको दायित्वभित्र पर्ने फोहरमैला व्यवस्थापन कार्यमा पनि छलफल गरेको छ । बैठकले विविधमा राखिएका प्रस्तावमाथि छलफल गर्दै, उपभोक्ता समितिले सम्पादन गर्ने पूर्वाधार निर्माणका काममा भ्याट बिल जारी मिल्ने सामनमा भ्याट बिल नै स्वीकार गर्ने र मूल्य अभिवृद्धि करबापत्को मूल्य भुक्तानी गर्ने निर्णय गरेको महानगरपालिकाले जनाएको छ ।