बिदुर ५ का बाढी प्रभावितहरुलाई रेडक्रसको नगद सहयोग

नुवाकाेट । गत भदौं १० गतेको भोटेकाशी बाढीका कारण प्रभावित बिदुर नगरपालिका वडा नम्वर ५ का नागरिकहरुलाई नुवाकोट रेडक्रस सोसाईटी मार्फत नगद सहयोग उपलब्ध गराईएको छ ।

रेडक्रसको बहुद्धेश्यीय नगद सहायता कार्यक्रम अन्तर्गत दुईसय ५७ जना प्रभावितहरुलाई नगद सहायता उपलब्ध गराईएको हो । यस अन्तर्गत मृतकका परिवार, बेपत्ता भएकाका परिवार र घर पूर्ण र घरमा बस्ने अवस्था नरहेका परिवारलाई १५ हजार रुपैयाँका दरले नगद सहायता उपलब्ध गराईएको नुवाकोट रेडक्रसले जनाएको छ ।

विदुर नगरपालिका वडा नम्वर ५ को कार्यालयमा भएको कार्यक्रमका विदुर नगरपालिकाका प्रमुख राजन श्रेष्ठ, उपप्रमुख प्रभा बोगटी, बिदुर ५ का वडा अध्यक्ष लिलानाथ न्यौपाने, नगद रकम बितरणका लागि सहयोगी संस्था ईन्टरनेशनल फेडेरेशन अफ रेडक्रस -आईसिआरसी) का क्षेत्रीय प्रतिनिधि अलेकजेण्डर म्याथ्यु र नुवाकोट रेडक्रसका सभापति हरी श्रेष्ठले एकसय ६ जना प्रभावित हरुलाई नगद सहायता बितरण गरे ।

रेडक्रसका अनुसार कूल प्रभावित दुईसय ८७ जना मध्ये एकसय ५१ जनालाई बैंक खाता मार्फत नगद उपलब्ध गराईएको छ भने बाँकी ३० जनालाई वडा कार्यालय मार्फत नै रकम उपलब्ध गराईने छ ।

नुवाकोट रेडक्रसले बिदुर नगरपालिकाका बाढी प्रभावित १७ सय १० जनालाई नै नगद सहायता उपलब्ध गराउने तयारी गरिरहेको रेडक्रसका जिल्ला सभापति श्रेष्ठले बताए ।

वीपदका समयमा बहुद्धेश्यीय नगद सहायता कार्यक्रम मार्फत उपलब्ध गराईने रकम प्रभावितहरुले सम्मानजनक रुपमा आफ्ना आवश्यकताहरु परिपूर्ति गर्नका लागि प्रयोग गर्न सक्ने र त्यसले उनीहरुको दैनिक जीवनयापन केही हदसम्म भएपनि सहज हुने रेडक्रसको नगद तथा भाैचर सहायता संबन्धि कार्यक्रमका संयोजक भोजराज घिमिरेको भनाई छ ।