बट्टारमा निशुल्क आँखा परिक्षण शिविर सम्पन्न

नुवाकोट । बट्टारमा निशुल्क आँखा परिक्षण शिविर सम्पन्न भएको छ ।

लियो क्लब अफ नुवाकोट क्यापिटलको आयोजना तथा दृष्टि आँखा केन्द्र बट्टारको प्राविधिक सहयोगमा भएको कार्यक्रममा ३ सय जनाको निशुल्क आँखा परिक्षण गरिएको हो ।

आँखा परिक्षण गर्दा सामान्य समस्या देखिएकाहरुलाई औषधी वितरण समेत गरिएको लियो क्लब अफ नुवाकोट क्यापिटलकी अध्यक्ष निरु श्रेष्ठले जानकारी दिइन् ।

उनले जिल्लामा धेरै ठूलो संख्यामा आँखाको समस्या भएका बिरामी रहेकाले निशुल्क आँखा शिबिरको आयोजना गरेको बताइन् ।

यस्तै दृष्टि आँखा केन्द्र बट्टारका डा : राजेश कुमार चौरासियाले आँखा परिक्षण गरिएकामध्ये केहीमा सामान्य र केहीमा गम्भीर किसिमको रोग भेटिएको बताए ।

उनले संस्थाको सामाजिक उत्तरदायित्व वहन कार्यक्रम अन्तर्गत विभिन्न स्वास्थ्य शिविरमा प्राविधिक सहयोग गरेको बताए ।

लियो क्लब अफ नुवाकोट क्यापिटल र दृष्टि आँखा केन्द्र बट्टारले नुवाकोटको विभिन्न स्थानहरुमा पुगेर स्वास्थ्य परिक्षण तथा निशुल्क आँखा जाँच र चुस्मा वितरण समेत गरिरहेको छ ।