त्रिशूली–३ ‘बी’ को दुई तिहाइ काम सकियो

नुवाकोट ।  जनताको जलविद्युत् कार्यक्रमअन्तर्गत निर्माणाधीन ३७ मेगावाट क्षमताको माथिल्लो त्रिशूली–३ ‘बी’ जलविद्युत् आयोजनाको काम ६४ प्रतिशत सकिएको छ ।

गत जेठसम्म भौतिक प्रगति ६४ दशमलव २९ प्रतिशत र वित्तीय प्रगति ५० दशमलव ४६ प्रतिशत भएको प्रवर्द्धक त्रिशूली जलविद्युत् कम्पनी लिमिटेडका प्रबन्ध सञ्चालक मोहनप्रसाद गौतमले बताए ।

कोरोना संक्रमणपछि आयोजनामा कार्यरत चिनियाँहरू नयाँ वर्ष मनाउन ०७६ माघ दोस्रो साता घर गएका थिए । उनीहरू काममा फर्कन र चीनबाट उपकरण तथा सामग्री ल्याउन नसक्दा पूर्ण रूपमा काम हुन नसकेपछि करिब १५ महिना ठप्पप्रायः भएको थियो ।

आयोजनाको निर्माण ०७७ चैतबाट मात्र पुनः सुचारु भएकोमा कोरोनाका कारण तीन सातासम्म काम प्रभावित भएको थियो । त्यसका साथै मुख्य सुरुङमा अनुमानभन्दा ज्यादै कमजोर चट्टान फेला परेका कारण पनि निर्माण प्रभावित भएको थियो । आयोजना निर्माण असोज ०८० भित्र (सेप्टेम्बर २०२३) सम्पन्न गर्ने लक्ष्यका साथ धमाधम काम भइरहेको प्रबन्ध सञ्चालक गौतमले बताए । माथिल्लो त्रिशूली–३ ‘बी’ इन्जिनियरिङ, खरिद तथा निर्माण (ईपीसी) मोडेलमा चिनियाँ कम्पनी सुइफा एएनएचइ ग्रुप कम्पनी लिमिटेडले हाइड्रोइलेक्ट्रिक इन्जिनियरिङसँग ठेक्का सम्झौता भएको थियो ।

अहिले इन्टेक, मुख्य सुरुङ, पेनस्टक, सर्जट्यांक, विद्युत्गृह र टेलरेसलगायत मुख्य संरचना निर्माण गरिरहेको छ । आयोजनाको ३७९२ मिटर सुरुङमध्ये ३२६८ मिटर सुरुङ निर्माण भइसकेको छ । आयोजनाको विद्युत्गृहसहित अधिकांश भाग किस्पाङ गाउँपालिका ५ मा निर्माणाधीन छ ।

३७ मेगावाट क्षमताको उक्त आयोजना नेपाल विद्युत् प्राधिकरण र नेपाल दूरसञ्चार कम्पनी लिमिटेड (नेपाल टेलिकम) को मुख्य लगानीमा निर्माण भइरहेको छ । ठेक्का सम्झौताअनुसार ठेकेदार कम्पनीले आयोजनाको सिभिल, इलेक्ट्रोमेकानिकल र हाइड्रो मेकानिकलतर्फका सम्पूर्ण संरचना र उपकरणको डिजाइन, निर्माण तथा जडान गर्नेछ ।

यो आयोजना नुवाकोट र रसुवामा निर्माण भएको ६० मेगावाटको माथिल्लो त्रिशूली–३ ‘ए’ को क्यास्केड आयोजना हो । क्यास्केड आयोजना भएकाले ३ ‘ए’ जलविद्युत्बाट झरेको पानी सिधै सुरुङभित्र पुर्‍याइन्छ । ३ ‘बी’ ले बाँध, बालुवा थिग्य्राउने पोखरी (डिसेन्डर) लगायतका संरचना बनाउन पर्दैन । आयोजनाको प्रवर्द्धक त्रिशूली जलविद्युत् कम्पनी लिमिटेडमा प्राधिकरण र नेपाल टेलिकमको ३०/३० प्रतिशत सेयर छ । कम्पनीमा रसुवा र नुवाकोटका स्थानीय तहहरूको ५ प्रतिशत, रसुवा तथा नुवाकोटका स्थानीय वित्तीय संस्थाको ५ प्रतिशत, रसुवा तथा नुवाकोटवासीको १० प्रतिशत, सर्वसाधारणको १५ प्रतिशत र प्राधिकरण तथा टेलिकमका कर्मचारीको ५ प्रतिशत सेयर रहनेछ ।

अनुमानित निर्माण लागत ७ अर्ब ४४ करोड र निर्माण अवधिको प्रक्षेपित ब्याज ७८ करोड रुपैयाँ रहेको आयोजनामा ३० प्रतिशत इक्विटी (२ अर्ब ४७ करोड) र ७० प्रतिशत ऋण (५ अर्ब ७६ करोड) बाट लगानी जुटाइएको छ । आयोजनामा नबिल बैंकको अगुवाइमा गठन भएको सहवित्तीयकरणमार्फत ऋण लगानी रहेको छ । प्रवर्द्धक कम्पनी र बैंकहरूबीच ०७५ भदौ ४ मा ऋण सम्झौता भएको हो । उत्पादन हुने विद्युत् खरिदबिक्रीका लागि प्राधिकरणसँग विद्युत् खरिदबिक्री सम्झौता (पीपीए) भइसकेको छ ।