ढुवानी व्यवसायीको हड्तालका कार्यक्रम फिर्ता

काठमाडौं : सरकारले माग सम्बोधन गर्ने आश्वासन दिएपछि ढुवानी व्यवसायी हड्तालका कार्यक्रम फिर्ता गरेर काममा फर्केका छन् । सरकारसँग तीन बुँदे सहमति भएपछि ढुवानी व्यवसायी काममा फर्कन सहमत भएका हुन् ।

ढुवानीका साधनलाई पूर्ववतरुपमै रुट परमिट दिन केन्द्र सरकारले सहजीकरण गर्ने, ढुवानीमा भ्याट र मालवस्तु तथा ढुवानी साधनको अनुगमन प्रणाली ‘भीसीटिएस’ पालना नगर्ने, ट्रक तथा चालकमाथि तत्काल जरिवाना नलाग्ने सहमति सरकारसँग भएको हो । सहमति कार्यान्वयनका लागि भौतिक पूर्वाधार तथा यातायात मन्त्रालयका सहसचिव राजेश्वर ज्ञवालीको संयोजकत्वमा ९ सदस्यीय कार्यदल गठन गरिएको छ कार्यदलले ३० दिनभित्र सूझावसहितको प्रतिवेदन पेश गर्नेछ ।

सरकारले साउनदेखि कार्यान्वयनमा ल्याएको ‘भिसिटीएस’को विरोधमा ढुवानी व्यवसायीले यातायातका साधन सञ्चालनमा ल्याएका थिएनन् । सरकारले भिसिटीएस ढुवानी व्यवसायी र चालकले कार्यान्वयन गर्न नपर्ने आश्वासन दिएपछि उनीहरु काममा फर्केका हुन् । उद्योग वाणिज्य तथा आपूर्तिमन्त्री मातृका यादव, भौतिक पूर्वाधार तथा यातायातमन्त्री रघुवीर महासेठ र व्यवसायीबीच भएको छलफलमा सहमति जुटेको हो ।