नुवाकोटमा झनै बढ्यो अवैध उत्खनन

नुवाकोट साउन ३, नुवाकोटका खोलाहरुमा प्राकृतिक स्रोतसाधनको अवैध उत्खनन् अझै बढेको छ ।

प्राकृतिक स्रोत साधन उत्खनन् र परिचालनको जिम्मा स्थानीय तहरुले पाएपछि कतै स्थानीय तहबीचमै विवाद देखिएको छ भने कतै ठेक्काको बहानामा मनपरि उत्खनन् भइरहेको छ । केही दिनअघि उत्खनन्को बिषयमा केही गाउँपालिकाबीच सीमा विवाद पनि देखिएको छ । नुवाकोटमा अनुमित बेगर उत्खनन् गरेको भन्दै प्रहरी नै परिचालन गर्नुपर्ने अवस्था देखिएको छ ।
जिल्ला अनुगमन समन्वय समिति र जिल्ला प्रशासन कार्यालय नुवाकोटले असारदेखि भदौ महिनासम्म नदीजन्यपदार्थ उत्खनन गर्न प्रतिबन्ध लगाएपनि तस्करहरुले नदी दोहनको काम तिव्र पारिरहेका छन । तस्करहरुले दिउँसोका समयमा हाते औजार र रातको समयमा खोलामा मेसिन हालेर नै वालुवा झिकिरहे पनि प्रहरी र प्रशासन मौन रहेको नुवाकोट र धादिङको सिमाना कोल्पुटारका एक स्थानियले बताए । व्यवसायीले जथाभावी गरेको उत्खननले गाउँहरु समेत समेत जोखिममा पर्न थालेका छन् । जथाभावीको उत्खननले गाउँ नै जोखिममा परेको स्थानीयले बताएका छन् । अवैध उत्खनन् नरोकिएमा कोल्पुटारको पुल नै जोखिमामा पर्ने अवस्था रहेको छ ।

प्राकृतिक स्रोत साधन परिचालनको जिम्मा स्थानीय तहले पाएपछि अझ बढी बेथिति बढेको छ । स्थानीय सरकारले स्रोत साधन जोगाउन नसक्दा स्थानीयवासीले माथिल्लो निकाय गुहार्ने अवस्थासमेत आएको छ । खोलामा अवैध उत्खनन् भएपछि स्थानीयले अनुगमनको लागि जिल्ला समन्वय समितिमा निवेदन समेत दिएका थिए । सो निवेदनअनुसार अनुगमनमा जाँदा धेरै बेथिति देखिएको जिल्ला समन्वय समिति नुवाकोटले जनाएको छ । बेथिति रोक्न र संभावित क्षेत्रमा निगरानी बढाउन स्थानीयवासी, स्थानिय तह र प्रहरीलाई निर्देशन दिएको जिल्ला प्रशासन कार्यालय र जिल्ला समन्वय समितिको कार्यालयले जानकारी दिएको छ ।
जिल्ला अनुगमन समन्वय समितिका सदस्य तथा प्रमुख जिल्ला अधिकारी द्रोण पोखरेलले कानूनभन्दाबाहिर गएर काम गर्न कसैलाई छुट नभएकाले प्रहरी प्रशासन कडाइका साथ लाग्ने बताए । अवैध रुपमा उत्खनन् भएको गुनासो आएको भन्दै उनले जसरी पनि कानूनी दायरामा ल्याउने बताए । नुवाकोटको कोल्पुटार,रातमाटेर काशीटार, ढिकुरे लगायतका क्षेत्रमा प्रशासनले निगरानी बढाएको बताइएको छ ।