बुधसिंहको दलितबस्ती १५ दिनदेखि अन्धकारमा

नुवाकोट जेठ ९, तारकेश्वर गाउँपालिका वडा नम्बर ४ बुधसिंहको दलित बस्तीमा १५ दिनदेखि बत्ती नहुँदा गाउँनै अन्धकार भएको छ ।

गाउँमा बत्ति नभएपछि आफुहरुको दैनिकी कष्टकर बनेको स्थानिय दिपक सिंखडाले जानकारी दिए । सडक निर्माण गर्दा तार यत्रतत्र परेको र पटकपटक नेपाल विद्युत प्राधिकरणमा जानकारी गराउँदा समेत वेवास्ता गरेको सिंखडाले बताए । उनले आफुहरुको गुनासो प्राधिकरणका कर्मचारीले नसुनेको भन्दै प्रमुख जिल्ला अधिकारी उद्धववहादुर थापालाई गुहार्न बाध्य भएको टेलिफोनमार्फत जानकारी दिए ।

बुधसिंहमा बत्ति नआएको १५ दिन भयो, प्राधिकरणका कर्मचारीले गुनासो संंम्बोधन नगरेको भन्दै आफुलाई समेत फोन आएको प्रमुख जिल्ला अधिकारी उद्धववहादुर थापाले बताए । प्रजिअ थापाले आफुलाई गुनासो आउने बित्तिकै नेपाल विद्युत प्राधिकरण नुवाकोट वितरण केन्द्रका प्रमुख सन्तोष कुमारको ध्यानाकर्षण गराएका थिए । तर वितरण केन्द्रका प्रमुख सन्तोष कुमारले भने पोल अभावको कारण ३ दिनदेखि वुधसिंहमा विद्युत सेवा अवरुद्ध भएको बताए । उनले अहिले कार्यालयमा पोल नभएको भन्दै विद्युत सेवा सुचारु हुन केही दिन लाग्ने बताए ।

गाउँको ६० भन्दा बढी दतिल बस्तीमा विद्युत सेवा अवरुद्ध हुँदा विशेष गरि बालिबालिका, वृद्धवृद्धा र अपाङ्गता भएका व्यक्तिहरु मर्कामा परेको स्थानियबासीले बताएका छन । १५ दिन जति भयो बत्ती गएको बालबालिकाको पढाईमा समेत असर परेको स्थानिय सिंखडाले जानकारी दिए । उनले विद्युत सेवा सुचारु गर्न पहल गरिदिन गाउँपालिका र सम्बन्धित निकायलाई पहल गरेपनि सुनुवाई नभएको दुखेसो पोखे ।