नेपाली कामदारलाई लैजाने विधि र प्रक्रियाबारे छलफल गर्न जापानी टोली नेपाल आउने

नेपाली कामदारलाई जापान लैजाने विधि र प्रक्रियाका बारेमा छलफल गर्न जापानबाट प्राविधि समूह आगामी माघमा नेपाल आउने भएको छ ।

सोमबार श्रम, रोजगार तथा सामाजिक सुरक्षामन्त्री गोकर्ण विष्टलार्इ भेटेर नेपालका लागि जापानी राजदूत मासामिची साइगोले यस्तो जानकारी गराएका हुन् । भेटमा मन्त्री विष्टले जापानमा नेपाली कामदार पठाउँदा भर्ना र छनोट प्रणालीलाई पारदर्शी तथा भरपर्दो बनाइनुपर्नेमा जोड दिएका थिए ।

राजदूत साइगोले भने नेपाली श्रमिकलाई पारदर्शी र प्रतिस्पर्धात्मक प्रक्रियाद्वारा जापान पठाउने सन्दर्भमा जापान सरकारको धारणा सकारात्मक रहेको बताएका थिए ।उनले नेपाली कामदारलाई जापान लैजाने विषयमा कार्य अघि बढिसकेको जानकारी गराउँदै प्राविधिक समूहको अध्ययन पछि थप प्रक्रिया सुरू हुने जानकारी दिए ।छलफलमा कामदारको योग्यता, क्षमता, सीप र दक्षताका आधारमा प्रतिस्पर्धात्मक प्रक्रियाद्वारा कामदारको छनोट पारदर्शी रुपमा हुनुपर्ने धारणा नेपालको थियो ।

नेपाली युवा कामका लागि जापान जाँदा कुनै मध्यस्थता वा विचौलियाको ठगीमा नपरून् भन्ने विषयमा सरकार सजग रहेको मन्त्री गोकर्ण विष्टले स्पष्ट पारेका थिए । भेटमा मन्त्री र राजदुतबीच दुवै देशको पारस्पारिक हित अनकूल उपयुक्त विधि, प्रक्रिया र संयन्त्र तयार गरी अपेक्षित समयमा नै जापान कामदार पठाउने प्रक्रिया अगाडि बढाउने विषयमा समेत छलफल भएको थियो ।