माथिल्लो तामाकोशीको आइपीओ मंगलबार बाँडफाँट हुने,कति कित्ता पर्ला ?

नुवाकोट,माथिल्लो तामाकोशीको आइपीओ मंगलबार (मंसिर ११ गते) बाँडफाँट हुने भएको छ ।

बिक्री प्रबन्धक नागरिक लगानी कोषका सेयर शाखा प्रमुख रोशनजंग कार्कीका अनुसार आगामी मंगलबार बाँडफाँट गर्ने निश्चित भएको हो । तामाकोशीको आइपीओमा थुप्रैले दोहोर्याएर आवेदन दिएको भेटिएपछि बाँडफाँटमा केही विलम्ब हुन गएको बिक्री प्रबन्धकको भनाई छ ।  अहिलेसम्मको तथ्यांक भेरिफाई गर्दा करिब ६ हजार जनाले दोर्याएर आवेदन दिएको भेटिएको छ । यो तथ्यांकमा पनि सामान्य तलमाथि हुन सक्ने बिक्री प्रबन्धकको भनाई छ । यसअघि सुरुवाती छानबिनमा करिब १२ हजार जतिले दोहोर्याएर आवेदन दिएको आशंका गरिएको थियो । यसमा न्यूनतम पनि ४० कित्ता सबैले सेयर पाउने प्रारम्भिक अनुमान गरिएको छ ।

कर्मचारी र स्थानीयबासीका लागि तामाकोशीले यसअघि नै सेयर निष्कासन गरी बाँडफाँटसमेत गरिसकेको छ । यसरी सेयर पाइसकेका मध्ये केहीले पुनः दोहोर्याएर भरेपछि छानबिन गर्नुपरेको हो । माथिल्लो तामाकोशीले गत कात्तिक १५ गतेदेखि प्रतिकित्ता १०० रुपैयाँ दरमा १ करोड ५८ लाख ८५ हजार कित्ता आइपीओ खुला गरेको थियो । सर्वसाधारणका लागि १ करोड ५० लाख ९० हजार ७५० कित्ता आइपीओ बिक्री खुला गरिएको हो । यसमा ६ अर्ब ७० करोड ५८ लाख २८ रुपैयाँ बराबरको आवेदन परेको छ । ३ लाख ४६ हजार १६६ जना आवेदकले ६ करोड ७० लाख ५८ हजार २८० कित्ताका लागि सेयर भरेका छन् ।