भोटेकोशी बाढीपीडित नुवाकोटका मोबाइल व्यवसायीलाई ८ लाख २५ हजार सहयोग

नुवाकोट । भोटेकोशी बाढीबाट प्रभावित रसुवा र नुवाकोटका मोबाइल व्यवसायीलाई नेपाल मोबाइल व्यवसायी महासंघले राहत सहयोग उपलब्ध गराएको छ ।

नेपाल मोबाइल व्यवसायी संघ नुवाकोटमा आबद्ध १८ जना व्यवसायीका लागि एकमुष्ट ८ लाख २५ हजार रुपैयाँ राहतस्वरूप प्रदान गरिएको हो ।

उक्त राहत रकम नेपाल मोबाइल व्यवसायी महासंघका अध्यक्ष रमेश घिमिरेले नेपाल मोबाइल व्यवसायी संघ नुवाकोटका अध्यक्ष सरोज श्रेष्ठलाई हस्तान्तरण गरेका छन् ।

राहत रकम हस्तान्तरण कार्यक्रममा महासंघका संस्थापक अध्यक्ष भरत भट्टराई, पदाधिकारी तथा विभिन्न जिल्लाका प्रतिनिधिहरूको उपस्थिति रहेको थियो ।

बाढीबाट प्रभावित व्यवसायीलाई राहत तथा सहयोग जुटाउन महत्वपूर्ण योगदान गरेको भन्दै काभ्रे, मकवानपुर र काठमाडौं जिल्लालाई विशेष धन्यवाद दिइएको छ ।

महासंघले विपद्का समयमा प्रभावित व्यवसायीको साथमा उभिँदै आवश्यक सहयोगलाई निरन्तरता दिने जनाएको छ ।