दोलखाको पहिरोमा परेर नुवाकोटका सुनिल मृत्यु

नुवाकोट । दोलखाको विगु गाउँपालिकामा पहिरोमा परेर नुवाकोटका एक जनाको मृत्यु भएको छ ।

मृत्यु हुनेमा नुवाकोटको विदुर नगरपालिका वडा नम्बर ४ का २९ वर्षिय सुनिल न्यौपाने रहेका छन् ।

दोलखाको विगु गाउँपालिका वडा नम्बर १ हुरहुरेमा आएको पहिरोमा परि उनको मृत्यु भएको हो ।

बुधबार दिउँसो सानिमा हाईड्रो जाने सडक सर्भे गर्ने क्रममा माथिबाट झरेको पहिरोमा परेर न्यौपानेको मृत्यु भएको प्रहरीले जनाएको छ । पहिरोमा परी गम्भीर घाइते भएका न्यौपानेको उपचारका क्रममा मृत्यु भएको प्रहरीले जनाएको छ ।

यस्तै पहिरोमा परेर अन्य दुई जना घाइते भएका छन् । घाइते हुनेमा रामेछाप लिखु तामाकोसी गाउँपालिका–४ का विशाल बुढाथोकी र सिन्धुपाल्चोक मेलम्ची नगरपालिका–१ का सन्दिप चौलागाईं गम्भीर घाइते भएको जिल्ला प्रहरी कार्यालय दोलखाले जनाएको छ ।

दुई जनाको अवस्था गम्भीर रहेको प्रहरीले जनाएको छ । उनीहरू तीनै जना सानिमा हाईड्रोको कर्मचारी रहेको प्रहरीले जनाएको छ ।

पहिरोबाट उद्धार गरिएका उनीहरूलाई हेलिकप्टरमार्फत थप उपचारका लागि काठमाडौं लगिएको थियो ।

चीनसँग सिमा जोडिएको लप्ची नजिकै सानिमाले जलविद्युत् निर्माण गरिरहेको छ ।