खेलाडीलाई खेल सामाग्रीसहित वडाध्यक्ष ढुङ्गेलको विदाई

नुवाकोट । विदुर नगरपालिका वडा नम्बर ४ ले प्रथम विदुर मेयर अन्तर वडास्तरीय ट्वान्टी–२० क्रिकेट प्रतियोगितामा सहभागि जनाउन लागेको आफ्नो टिमलाई खेल सामाग्रीसहित विदाई गरेको छ ।

बुधवार वडा कार्यालयमा एक कार्यक्रमको आयोजना गरेर वडाध्यक्ष निलमबाबु ढुङ्गेलले खेलाडीहरुलाई खेल सामाग्रीसहित विदाई गरेका हुन् । वडाले वितरण गरेको खेल सामाग्रीमा जर्सी, ट्रयाक, वल ब्याट र प्याड लगायत रहेका छन् ।

त्यस्तै खेलाडीहरुलाई श्री कृष्ण फर्निचरका संचालक तथा विदुर ४ का वडासचिव दिपक मुडवरीले क्याप उपलब्ध गराएका छन् ।
खेल सामाग्री वितरण गर्दै वडाध्यक्ष ढुङ्गेलले टिमले राम्रो खेल प्रर्दशन गर्दै उत्कृष्ट नतिजा ल्याउने विश्वास व्यक्त गरे । उनले आगामी दिनमा नगरपालिकासँग समन्वय गरेर क्रिकेट खेलका नयाँ प्रतियोगिता गराउन पहल गर्ने बताए ।

बिहिबारबाट शुरु हुने प्रथम विदुर मेयर अन्तर वडास्तरीय ट्वान्टी–२० क्रिकेट प्रतियोगितामा विदुर –४ ले पहिलो खेल वडा नम्बर ५ सँग प्रतिष्पर्धा गर्नेछ ।

प्रतियोगितामा विदुर नगरपालिकाका विभिन्न ११ वडाको सहभागिता रहेको छ । प्रतियोगिताको विजेताले ५० हजार, उपविजेताले २५ हजार रुपैयाँ,मेडल,ट्रफी र प्रमाणपत्र हात पार्ने छ ।

विदुर नगरपालिकाको आयोजना र नुवाकोट जिल्ला क्रिकेट संघको सहकार्यमा हुन लागेको प्रतियोगिताको फाईनल खेल असार ७ गते हुनेछ ।