पदक विजेता खेलाडीलाई विदुर नगरपालिकाको सम्मान

नुवाकोट । विदुर नगरपालिकाले १४ औं जिल्लास्तरीय राष्ट्रपति रनिङ शिल्ड प्रतियोगितामा पदक विजेता खेलाडीहरुलाई सम्मान गरेको छ ।

बिहिबार विदुर नगरपालिकामा आयोजित एक कार्यक्रममा नगरपालिकाका प्रमुख राजन श्रेष्ठ, उपप्रमुख प्रभा बोगटी र विदुर १ का वडाध्यक्ष लेनिन रञ्जित लगायतले पदक विजेता खेलाडीहरुलाई नगद र प्रमाणपत्रसहित सम्मान गरेका हुन् ।

खेलाडी सम्मान कार्यक्रममा बोल्दै मेयर श्रेष्ठले आगामी वर्षदेखि खेलाडी उत्पादनको लागि नगरपालिकाले खेलकुद एकेडेमी संचालनमा ल्याउने बताए । उनले विदुर नगरपालिकाबाट पनि आफुले प्रिती राई र सन्दीप लामीछानेजस्ता खेलाडी उत्पादन भएको हेर्न चाहेको बताए । त्यसको लागि खेलकुद क्षेत्रमा पर्याप्त बजेट विनियोजन गर्ने मेयर श्रेष्ठले प्रतिवद्धता जनाए ।

यस्तै कार्यक्रममा बोल्दै नगरपालिकाकी उपप्रमुख बोगटीले नगरपालिकाले गरेको लगानी र मेहेनत अनुसार खेलाडीहरुले उत्कष्ट नतिजा आएको बताइन् । उनले नगरपालिकाले समग्र खेलकुद क्षेत्रमा लगानी गरेकोले त्यसको नतिजा आउन थालेको बताइन् ।

कार्यक्रममा विदुर नगरपालिका वडा नम्बर १ का वडाध्यक्ष लेनिन रञ्जितले पहिलो पटक नगरपालिकामा रनिङ शिल्ड ल्याउन सफल भएको भन्दै खुशी व्यक्त गरे । उनले खेलकुदमा गरेको लगानीको प्रतिफल देखिँदै गएकोले आगामी दिनमा खेल क्षेत्र विशेष रहने बताए ।

प्रतियोगितामा स्वर्ण, रजत र कास्य पदक विजेता खेलाडीलाई क्रमशः ५ हजार, ३ हजार र १ हजार ५०० रुपैँया नगदसहित सम्मान पत्र वितरण गरिएको छ । पञ्चकन्या गाउँपालिकाको घ्याङस्वाँरामा भएको प्रतियोगितामा १७ स्वर्ण जित्दै विदुर प्रथम बनेको थियो ।

राष्ट्रपति रनिङ शिल्ड प्रतियोगितामा विदुरले १७ स्वर्ण ५ रजत र १६ कास्य गरेर कुल ३८ पदक सहित पहिलो स्थान हासिल गरेको थियो ।

कार्यक्रममा विदुर नगरपालिकाका प्रमुख प्रशासकिय अधिकृत शुभाकार पौडेल, वडा नमबर २ का वडाध्यक्ष दिपक कायस्थ , विदुर नगर खेलकुद समितिका अध्यक्ष अच्युत गिरी लगायत विभिन्न सरोकारवालाहरुको उपस्थिति रहेको थियो ।