दशैको तेस्रो दिन आज चन्द्रघण्टा देवीको पुजा गरिँदै

विदुर खबर २०७५ असोज २६ गते ९:४०

 

Advertisement

नुवाकोट, नवरात्रको तेस्रो दिन आज दशैंघर तथा शक्तिपीठमा चन्द्रघण्टा देवीको पूजा आराधना गरिँदैछ । चन्द्रघण्टा भवानी दुर्गाकी तेस्रो रूप हुन् । शिरमा घण्टा आकारको चन्द्रमा भएकाले यिनको नाम चन्द्रघण्टा भनिएको हो । सिंहमाथि बसेकी यिनको दशवटा हातमा खड्ग, तरवार, गदा, ढाल चक्र धनुष आदि शस्त्र अस्त्र रहेका छन् । भयनाश, दुष्टप्रवृत्तिको नाश र आध्यात्मिक तथा आत्मिक शान्तिका लागि चन्द्रघण्टाको आराधना गरिन्छ । विधिपूर्वक यिनको आराधना गर्नाले काममा आइपर्ने बाधा व्यवधान हट्ने पनि विश्वास गरिन्छ । आश्विन शुक्ल प्रतिपदाका दिन घटस्थापना गरी घडामा आवाहन गरी नौ दिनसम्म दुर्गाका नौ स्वरूपको आराधना गर्ने परम्परा छ ।यसै घडामा महाकाली–महालक्ष्मी– महासरस्वतीको पनि आराधना गरिन्छ । नवरात्रको अवसरमा देवीभागवत महापुराण र देवी माहत्म्य दुर्गा सप्तशती पाठ गर्ने परम्परा छ । यो समयमा विभिन्न शक्तिपीठको दर्शन गर्नाले मनोकांक्षा सिद्धि हुने विश्वास गरिन्छ ।

प्रतिक्रिया