धादिङमा पहिरोले २ जना पुरिए, खोलाले बगाएर एक बालिका बेपत्ता

नुवाकोट । लगातार वर्षा भइरहेको बेला धादिङको मलेखु खोलामा माछा मार्न गएका बेनीघाट रोराङ गाउँपालिका वडा नम्बर ६ का ४० वर्षीय जनता चेपाङ र २० वर्षीय सन्तु चेपाङ पहिरोमा परेर बेपत्ता भएका छन् ।

खोला बढेपछि नजिकै रहेको ओढारमा ओत लाग्ने क्रममा पहिरो खस्दा पहिरोमा परेर चेपाङद्वय बेपत्ता भएको इलाका प्रहरी कार्यालय गजुरीका प्रमुख डीएसपी डिल्लीराज पाण्डेले बताए ।

नदीमा माछा मार्न जान लागेका उनीहरू निरन्तरको वर्षाका कारण गजुरी गाउँपालिका वडा नम्बर २ गुम्बाडाँडामा रहेको ओडारमा बस्दा पहिरोले पुरिएका हुन् । नेपाल प्रहरी, सशस्त्र प्रहरी, नेपाली सेना र स्थानीयवासीले पहिरो पन्छाएर उनीहरूको खोजी गरिएको भए पनि नभेटिएपछि उद्धार टोली शनिबार बिहानबाट खोजीलाई निरन्तरता दिन राति अबेर फर्किएको छ ।

यता धादिङको गजुरी गाउँपालिकाको वडा नम्बर ७ र ८ को बीचमा पर्ने घट्टेखोलाले बगाउँदा दोभान खर्ककी ६ वर्षीया सइरा तामाङ बेपत्ता भएकी छन् । खोलाले बालिकासहित उनकी हजुरआमा ठूलीमाया तामाङ र मोटरसाइकल चालक स्थानीय राजकुमार तामाङलाई पनि बगाएकोमा उनीहरू भने पौडिएर जोगिन सफल भएका थिए । मोटरसाइकलसहित बालिकालाई खोलाले बगाएको ८ नम्बर वडाका वडाध्यक्ष देवराज ओझाले बताए ।

पौडिएर बाँचेका दुवै जनाको उपचारका लागि आदमघाट सामुदायिक अस्पतालमा पठाइएको छ । बेपत्ता बालिकाको राति अबेरसम्म खोजी प्रयास गरे पनि फेला नपरेको र खोलामा पानीको बहाव बढेका कारण अहिले खोजीकार्य स्थगित गरिएको छ ।

लगातारको वर्षाका कारण संघीय राजधानी काठमाडौं जोड्ने मुख्य सडक पृथ्वी राजमार्ग र त्रिभुवन राजपथमा ठाउँठाउँमा गएको पहिरोले दिनभर अवरोध बन्यो । धादिङको धुनीबेँसीको सिस्नेखोलामा पहिरोसँगै आएको लेदोका कारण त्रिभुवन राजपथअन्तर्गत नौबिसे–नागढुंगा खण्ड राति ९ बजेसम्म पूर्णरूपमा अवरुद्ध बन्यो । लगातारको वर्षासँगै सडक छेउमा आएको पहिरोको लेदोका कारण सडक अवरुद्ध भएपछि राजधानी भित्रिने र राजधानीबाट बाहिरिने सवारीसाधन रोकिएका थिए । राति अबेर गरी लेदो पन्छाइए पनि वर्षा निरन्तर भइरहेकाले सवारी आवागमन प्रभावित छ ।

पृथ्वी राजमार्गअन्तर्गत धादिङको मलेखु, सलाङघाट, थाक्रेको कमेरे, ४ किलो र ८ किलोमा गएको पहिरोले राजमार्ग राति अबेरसम्म ठप्प छ । निर्माणाधीन सडक आयोजना र सडक विभागको डोजर प्रयोग गरी पहिरो पन्छाउने काम गरिरहेको भए पनि धेरै स्थानमा पहिरो गएको कारण सवारी आवागमन सुचारु गर्न सकिएको छैन । संघीय राजधानी काठमाडौं प्रवेश गर्ने नाकाका रूपमा रहेको सडक अवरुद्ध हुँदा संघीय राजधानी प्रवेश गर्ने र बाहिरने यात्रु अलपत्र परेका छन् ।

राजमार्गमा पहिरोको जोखिम भएकाले प्रहरीले सवारीसाधनलाई सुरक्षित स्थानमा रोकेर बस्न भनिएको जिल्ला प्रहरी कार्यालय धादिङका सूचना अधिकारी प्रल्हाद सिलवालले जानकारी दिए । लगातारको वर्षाका कारण धादिङको अधिकांश ग्रामीण सडक पनि अवरुद्ध छ । त्रिशूली, आँखु, बुढीगण्डकीलगायतका नदी तथा खोलामा जलस्तर बढेको छ ।

धादिङ संवाददाता पोषनाथ अधिकारीको सहयोगमा