बेलकाेटगढी नगरपालिकाकाे प्रशासकीय भवन शिलान्यास

नुवाकाेट ।  बेलकाेटगढी नगरपालिकाले आफ्नो प्रशासकीय भवन निर्माण सुरु गरेको छ ।

नगरपालिकाको बाघखाेरमा निर्माण गरिने भवनको आइतबार एक कार्यक्रमबीच नगरप्रमुख जगतबहादुर गुरुङले शिलान्यास गरेका हुन् ।पालिका बनेदेखि नै अस्थायी भवनमा बसेर सेवा दिँदै आएको पालिकाले अब भने प्रशासनिक भवन बनाउने भएको छ ।

पालिकाका अनुसार पार्किङसहितको ४ तलामा ३८ वटा कोठाको भवन १२ करोड ७४ लाख २७ हजार ८८ रुपैयाँ लागतमा निर्माण हुनेछ ।

भवन आगामी २४ महिनाभित्र निर्माण सम्पन्न गर्ने गरी अम्बे माँ, न्यू टेक र शुभलक्ष्मी जेभि काठमाडौंसँग गत मङ्सिर १३ गते ठेक्का सम्झौता गरिएको थियाे ।

भवन शिलान्यास गर्दै नगरप्रमुख गुरुङले भवन निर्माणपछि नगरपालिकाका सबै शाखा एउटै भवनमा रहने र प्रदान गरिने सेवासमेत प्रभावकारी हुने बताए ।

नगरपालिकाका उपनगरप्रमुख शिवप्रसाद दाहालले विकाससँग जोडिएको प्रशासकीय भवन निर्माण गर्न सबैको सहयोग र साथ आवश्यक रहेको बताए ।