बट्टारमा गर्गेश्वर मोटर ड्राइभिङ्ग स्कुल तथा ट्रायल सेन्टर खुल्यो

नुवाकोट । नुवाकोटको विदुर नगरपालिका वडा नम्बर ४ को वालुवाटारमा गर्गेश्वर मोटर ड्राइभिङ्ग स्कुल एण्ड ट्रायल सेन्टर खुलेको छ ।

ट्रायल सेन्टरको शनिवार विदुर नगरपालिका वडा नमम्बर ४ का वडाध्यक्ष निलमबावु ढुङ्गेलले उद्घाटन गरेका हुन् । ट्रायल सेन्टरको उद्घाटन कार्यक्रममा बोल्दै वडाध्यक्ष ढुङ्गेलले नुवाकोटमा अत्याधुनिक ट्रायल सेन्टर खुल्नु भनेको वडा नै विकासको पथमा अघि बढेको बताए ।

उनले पछिल्लो समय बट्टार बजारमा विभिन्न व्यवसायकि कम्पनीहरु खोलिएको भन्दै खुशी व्यक्त गरे । वडाध्यक्ष ढुङ्गेलले ट्रायल सेन्टरबाट दक्ष चालक उत्पादन गर्ने विश्वास समेत व्यक्त गरे ।

यस्तै युवा नेता तथा रसुवाको उत्तरगया गाउँपालिकाका निर्वतमान अध्यक्ष उपेन्द्र लम्सालले नुवाकोटमा नै पहिलो पटक संस्थागत रुपमा ड्राइभिङ्ग सेन्टर खुलेको भन्दै खुशी व्यक्त गरे । उनले नुवाकोटमै सवारीचालक अनुमति पत्र प्राप्त गर्ने अवस्था सिर्जना गर्न जनप्रतिनिधिहरुले भुमिका खेल्नुपर्ने बताए ।

कार्यक्रममा जिल्ला ट्राफिक प्रहरी कार्यालय नुवाकोटका प्रमुख जेजंग कार्कीले ड्राइभिङ्ग सेन्टरले दक्ष चालकको साथसाथै ट्राफिक नियमहरुको वारेमा पनि जानकारी दिनुपर्ने बताए । उनले ट्रायल सेन्टर चालकहरुको पाठशाला रहेको बताउँदै चालकहरुलाई सबै ज्ञान दिनुपर्ने बताए ।

यससँगैे गर्गेश्वर मोटर ड्राइभिङ्ग स्कुल एण्ड ट्रायल सेन्टर नुवाकोटमा सरकारी मापदण्ड अनुसार संचालनमा आएको पहिलो ड्राईभिङ स्कुल बनेको छ ।

यसअघि नुवाकोटमा विभिन्न संस्थाले अनौपचारिक रुपमा ड्राइभिङ्ग स्कुल संचालन गरेपनि ट्रायल सेन्टर पहिलो पटक संचालनमा आएको हो ।