ढिकुरेको लिखु बगरमा खेलकुद तथा सांस्कृतिक महोत्सव हुने

नुवाकोट । नुवाकोट जिल्लाको लिखु गाउँपालिका वडा १ ढिकुरेको लिखु बगरमा यही मङ्सिर २८ गते बिहीबारदेखि नुवाकोट खेलकुद तथा सांस्कृतिक महोत्सव हुने भएको छ ।

जिल्लामा पहिलोपटक खेलकुद तथा सांस्कृतिक महोत्सव हुन लागेको हो । लिखु गाउँपालिकाको विशेष सहयोगमा नुवाकोट तेक्वान्दो डोजाङ, ढिकुरे युवा क्लब र पिप्ले युवा समाज आयोजक रहेको महोत्सवको आवश्यक तयारी तीव्र रूपमा भइरहेको छ ।

महोत्सवका लागि जिल्ला प्रशासन कार्यालय नुवाकोटले मंगलबार अनुमति दिएपछि महोत्सवको तयारीमा आयोजक संस्था दिनरात नभनी खटिरहेका छन् । स्थानीय उत्पादन, स्थानीय पहिचान जिल्लाको उत्पादनमा योगदान पुग्ने खालको प्रवद्र्धनात्मक कार्यक्रमसहित खेलकुद प्रतियोगिता र सांस्कृतिक कार्यक्रम गरिने आयोजकले जानकारी दिएको छ ।

महोत्सवमा दुई सयवटा व्यावसायिक स्टल र ५० वटा स्थानीय उत्पादन तथा प्रवद्र्धनात्मक स्टल रहने जानकारी आयोजकले दिएको छ । महोत्सवमा सबै विधाको खेलकुदको प्रतियोगिता गरिने र उत्कृष्टलाई आकर्षक नगद पुरस्कारसहित सिल्ड, ट्रफीको व्यवस्था गरिएकाले जिल्लामा विगतमा भएका महोत्सवभन्दा फरक र नाफारहित हुने जानकारी आयोजकले गराएको छ ।

महोत्सवमा राष्ट्रिय र स्थानीयस्तरका लोकदोहोरीका कलाकारको बेजोड प्रस्तुतिसहित स्थानीय कलाकारबीच लोकदोहोरी गीत प्रतियोगिता हुनेसमेत बताइएको छ । महोत्सव पुस १० गतेसम्म सञ्चालन हुनेछ ।