इजरायलमा मृत्यु भएका नेपाली विद्यार्थीप्रति श्रद्धाञ्जली अर्पण गर्दै नुवाकोटमा दीप प्रज्वलन

नुवाकोट । हमासले इजरायलमा गरेको विशाल आक्रमणमा परी मृत्यु भएका नेपाली विद्यार्थीहरूप्रति श्रद्धाञ्जली अर्पण गर्दै नुवाकोटमा विभिन्न संघसंस्थाले दीप प्रज्वलन गरेको छ ।

लियो क्लब अफ नुवाकोट क्यापिटल र नेपाल पुर्व प्रहरी संगठन जिल्ला कार्य समिती नुवाकोटले छुट्टाछुट्टै स्थानमा दिप प्रज्वलन गरेको हो ।

लियो क्लब अफ नुवाकोट क्यापिटलले बट्टारको पुरानो बजार र नेपाल पुर्व प्रहरी संगठन जिल्ला कार्य समिती नुवाकोटले विदुरको लोकतान्त्रिक चौतारोमा दीप प्रज्वलन गरेको हो ।

हमास आक्रमणमा परी अहिलेसम्म १० जना नेपाली विद्यार्थीहरू मृत्यु भइसकेको सरकारले जनाएको छ । प्यालेस्टाइन समर्थित विद्रोही समूह हमासले शनिबार इजरायलतर्फ मिसाइल आक्रमण गरेको थियो । त्यसयता प्यालेस्टाइन र इजरायलबीच फेरि युद्ध चर्किएको हो ।

यसबीच लेबनानस्थित विद्रोही समूह हिजबुल्लाह पनि यस युद्धमा जोडिएको छ । इजरायल नियन्त्रित सिब्बामा आइतबार हिजबुल्लाहले मोर्टार आक्रमण गरेको थियो ।

आक्रमणमा परी अहिलेसम्म ८ सयभन्दा बढी इजरायलीहरूको मृत्यु भइसकेको छ ।