भिमसेन माविका विद्यार्थीहरुलाई ट्रयाकसुट

नुवाकोट । विदुर नगरपालिका वडा नम्बर २ मा रहेको श्री भिमसेन माध्यामिक विद्यालयका विद्यार्थीहरुलाई ट्रयाकसुट वितरण गरिएको छ ।

शुक्रवार एक कार्यक्रमको आयोजना गरि विद्यालयका २ सय ६५ जना विद्यार्थीहरुलाई ट्रयाकसुट वितरण गरिएको हो । विदुर नगरपालिकाका मेयर राजन श्रेष्ठले नगरपालिकाबाट पाएको सेवा–सुविधाको रकम र विद्यालयको व्यस्थापन समितिका अध्यक्ष सुरजमान श्रेष्ठको व्यक्तिगत खर्चमा विद्यार्थीहरुलाई ट्रयाकसुट वितरण गरिएको हो ।

ट्रयाकसुट वितरण कार्यक्रममा बोल्दै नगरपालिकाका मेयर राजन श्रेष्ठले नगरपालिकाको मेयरमा निर्वाचित भएदेखि नै आफुले प्राप्त गरेको तलव भत्ता सामाजिक काममा खर्च गरिरहेको बताए । उनले यो पटक भिमसेन स्कुलका विद्यार्थीहरुलाई सहयोग पाउँदा खुशी व्यत्त गरे ।

मेयर श्रेष्ठले आगामी दिनमा पनि आवश्यकताको आधारमा आफुले प्राप्त गर्ने सेवा सुविधावापतको रकम खर्चन तयार रहेको बताए । उनले विदुर नगरपालिकाले नगर क्षेत्रभित्र रहेका सबै विद्यालयहरुको शैक्षिक गुणस्तर वृद्धि गर्न शिक्षक समायोजन गरिएको समेत जानकारी दिए ।

विद्यार्थीहरुलाई ट्रयाकसुट वितरण कार्यक्रममा विदुर नगरपालिका वडा नम्बर २ का वडाध्यक्ष दिपक कायस्थ, विद्यालय व्यवस्थापन समितिका सदस्यहरु, नुवाकोट उद्योग वाणिज्य संघका पुर्व अध्यक्ष शरणउत्सुक सापकोटा लगायतको उपस्थिति रहेको थियो ।