बैदेशिक रोजगारीबाट फर्किएकाहरुलाई विदुर नगरपालिकाको सहयोग

नुवाकोट । वैदेशिक रोजगारीबाट फर्किएका युवाहरुलाई विदुर नगरपालिकाले आर्थिक सहयोग गरेको छ ।

विदुर नगरपालिका, रोजगार सेवा केन्द्रको आयोजनामा बैदेसिक रोजगारबाट फर्केका ३३ जनालाई नगरपालिकाले उद्यमशील प्रर्वद्धन गर्नको लागि भन्दै जनही ४१ हजार रुपैयाँले अनुदान उपलब्ध गराएको हो ।

बिहिबार नगरपालिकामा आयोजित एक कार्यक्रममा नगरपालिकाका मेयर राजन श्रेष्ठ र उपमेयर प्रभा बोगटी लगायतले युवाहरुलाई अनदान रकम वितरण गरेका हुन् ।

विदेशबाट फर्केका युवाहरुलाई आवश्यकताको आधारमा स्वरोजगार बनाएर काम गर्नकै लागि विदेश जानबाट रोक्न अनुदान रकम वितरण गरेको मेयर राजन श्रेष्ठले बताए । उनले स्वरोजगारमार्फत युवाहरुलाई सक्रिय गराउन सके नगरको समेत आम्दानी बढ्ने बताए ।

कार्यक्रममा उमपेयर प्रभा बोगटीले रोजगारीकै लागि भनेर विदेशिने अवस्थाको अन्त्य गर्न नगरपालिका लागि परेको बताइन् ।

कार्यक्रममा विदुर नगरपालिकाका प्रमुख प्रशासकीय अधिकृत बिनोदकुमार खनाल, विभिन्न वडाका वडाध्यक्ष लगायतको सहभागिता रहेको थियो ।