बट्टार क्याम्पसको स्ववीयु कब्जा गर्न कांग्रेस, माओवादी र समाजवादी एकजुट

नुवाकोट । नुवाकोट आर्दश बहुमुखी क्याम्पसको स्ववीयु निर्वाचनमा तीन विद्यार्थी संगठनले गठबन्धन गर्ने निर्णय गरेका छन् ।

नेपाली कांग्रेसनिकट नेविसंघ, माओवादी केन्द्र निकटको अखिल क्रान्तिकारी र एकिकृत समाजवादी निकटको विद्यार्थी संगठन अनेरास्ववीयुले गठबन्धन गरेर चुनाव लड्ने सहमति गरेका हुन् ।

सहमति अनुसार १९ सदस्यीय कार्यसमितिको प्रत्यक्षतर्फका १० सिटमा गठबन्धन गर्ने निर्णय भएको छ । सहमति अनुसार नेविसंघले अध्यक्षसहित ३ सदस्य पाउने छ भने अखिल क्रान्तिकारीले सचिवसहित २ सदस्य पाउनेछ । त्यस्तै समाजवादी निकट अनेरास्ववीयुले कोषाध्यक्ष सहित दुई सदस्य पाउने बताइएको छ ।

सभापतिमा नेविसंघको तर्फबाट रविन दाहालले चुनाव लड्ने छन् भने सचिवमा अखिल क्रान्तिकारीका राजेन्द्र पनेरु र कोषाध्यक्षमा एकिकृत समाजबादी पार्टी निकट अनेरास्ववीयुका मनोज पौडेलले जिम्मा पाएका छन् ।

यस्तै प्रत्यक्षतर्फको सदस्यहरुमा नेविसंघको तर्फबाट अश्विन रिमाल, सन्तोष पन्त र सुप्रिया पौडेल रहेका छन् भने क्रान्तिकारीको तर्फबाट अस्मिता पौडेल, जनक भट्ट रहेका छन् ।

त्यस्तै अनेरास्ववीयुको तर्फबाट संजिता रिमाल र प्रदिप ढुङगाना रहेका छन् ।
तीन विद्यार्थी संगठनले गठबन्धन गरेर चुनाव लड्ने सहमति गरेसँगै एमाले निकट विद्यार्थी संगठन अनेरास्ववीयु दवावमा परेको छ ।

झण्डै १२ वर्षपछि हुन लागेको बट्टार क्याम्पसको स्ववीयु निर्वाचनलाई सबैले चासोको साथ हेरेका छन् । बट्टार क्याम्पसमा यसअघि एमाले निकट विद्यार्थी संगठन अनेरास्ववीयुले कब्जा गरेको थियो ।

बट्टार क्याम्पसमा कुल एक हजार एकसय ४३ जना मतदाता रहेका छन् ।