नुवाकोटमा नमुना मतदान सुरु

नुवाकोट । निर्वाचन आयोगले नुवाकोटमा मतदाता शिक्षा कार्यक्रम अन्तर्गत नमुना मतदान सुरु गरेको छ ।

नुवाकोटमा बुधबारदेखि जिल्ला निर्वाचन कार्यालयमार्फत् नमुना मतदान थालिएको हो । नमुना मतदान अन्तर्गत म्यागङ गाउँपालिका ५ सामरीस्थित ग्रामसेवा माविमा बिहीबार नमुना मतदान गरिएको हो। यसपटक प्रत्येक मतदाताले ४ वटा मतपत्रमा मतदान गर्नुपर्ने छ ।

पहिलो मतपत्रमा प्रतिनिधिसभाका प्रत्यक्षतर्फका उम्मेदवारलाई मतदान गरिसकेपछि प्रतिनिधिसभाकै समानुपातिकतर्फका उम्मेदवारका लागि, त्यसपछि तेस्रो मतपत्रमा प्रदेशसभाका लागि प्रत्यक्षतर्फका उम्मेदवारलाई र चौथो मतपत्रमा प्रदेशसभाको समानुपातिकतर्फको उम्मेदवारलाई मतदान गरिएको छ ।

जिल्ला निर्वाचन कार्यालयका जयप्रसाद गौतमले नुवाकोटका १२ वटै पालिकामा नमुना मतदान कार्यक्रम गरिने बताए । नमुना मतदानको अभ्यास गरेपछि आगामी मंसिर १ गतेसम्म प्रत्येक पालिकाको वडामा चयन गरिएका महिला स्वास्थ्य स्वयंसेविकाले १५ दिन स्थानीयको घरदैलोमा गएर मतदाता शिक्षा संचालन गर्नसक्ने बताए ।

स्थानीय तहको निर्वाचनमा मत बदर हुने भएपछि उक्त बदर मत घटाउन मतदाता शिक्षा कार्यक्रम संचालन गरिएको जिल्ला निर्वाचन अनुगमन समितिका सदस्य एवं प्रमुख जिल्ला अधिकारी नारायणप्रसाद रिसालले बताए । नुवाकोटमा २ लाख ३९ हजार मतदाता छन् ।