दशैंकाे मुखमा बजारमा सुन छैन,भाउ घट्ने संकेत

विदुर खबर २०७९ असोज २ गते २०:३३

नुवाकोट । दशैं घरदैलोमा आइपुगेको छ । यतिबेला बजारमा किनमेल गर्ने सर्वसाधारणहरुको घुचो देख्न सकिन्छ । सुनचाँदी पसलमा पनि सुन किन्नेहरुको भिडभाड देखिन्छ ।

चाडपर्वको समयमा सुन किन्ने उपयुक्त समय भएतापनि सुनको मूल्यमा अस्थिरता र सुनको अभाव हुँदा सुनचाँदी व्यापारले त्यति राम्रो गति लिन सकेको छैन । पछिल्लो समय अमेरिकाको फेडरल रिजर्भ बैंकले व्याजदर बढाएर रेकर्ड कायम गरेकाले सुनको मूल्य सस्तिएको थियो ।

तर अगस्ट २मा ताइवानमा अमेरिकी संसदकी सभामुख न्यासी पेलोसीले अचानक भ्रमण गरेपछि चीन र ताइवानबीचको सम्भावित युद्धका कारण विश्व सुनबजारमा असर पर्यो । सुन बजारमा रुस र यूक्रेन युद्धको प्रभाव केहि कम हुन नपाउँदै ताइवानमा भएको अमेरिकी हस्तक्षेपका कारण चीनको आक्रोशले युद्धको संकेत गरिराखेको छ । सोहि कारण विश्व सुनबजारका लगानीकर्ताहरुले लगानी अर्कोतर्फ मोड्दा सुनको भाउ महंगिएको सुनचाँदी व्यवासायी बताउँछन् । तर सो तनाव शान्त हुने संकेत पाएमा सुनको भाउ घट्ने आंकलन व्यवासायीहरुको छ ।

सुनको भाउ घटेर प्रतितोला ८५ हजार रुपैयाँसम्ममा झर्न सक्ने नेपाल सुनचाँदी व्यवसायी महासंघका महासचिव धर्म सुन्दर बज्राचार्यले बताए । ताइवानलाई लिएर चीन र अमेरिकाबीचको तनावका कारण सुनको भाउ बढेको हो । अन्यथा युद्धको जोखिम नभएको अवस्थामा सुनको भाउ घट्नुपर्ने हो । सुनको भाउ ८५ हजार रुपैयाँसम्म आउन सक्ने उनी सुनाउँछन् ।

हरेक वर्षझैं यस वर्षको दशैं पनि सुनचाँदी बजारमा रौनकता छ । तर माग बमोजिम व्यवसायीहरुले गरगहना आपूर्ति गर्न नसक्दा अवस्था भने कठिन बनेको छ । नेपालमा अहिले दैनिक ४० किलो सुनको माग भएतापनि नेपाल सरकारद्धारा १० किलो मात्र उपलब्ध गराइएको छ । जसकारण व्यवसायीहरुले अभावको सामना गरिरहनुपरेको छ ।

दशैं आउन लाग्दा नेपालमा सुनको माग उच्च रहेको छ तर सुन छैन । अहिलेको अवस्थामा ४० किलो भन्दा सुन चाहिने भएपनि १० किलो मात्र सरकारबाट पाइएको हामीलाई थेग्न गरिएको छ, महासचिव बज्राचार्य गुनासो पोख्छन् ।

अभाव हुन नदिन व्यवसायीहरुले नेपाल राष्ट्र बैंकको ढोका पनि ढकढकाएका छन् तर त्यसको सुनुवाई भने नभएकोमा उनीहरु दुखी भएको बताउँछन् । व्यवसायी बज्राचार्य भन्छन्, नेपाल राष्ट्र बैंकलाई अनुरोध गरेका छौं, तर कहिलेसम्म यो समस्या समाधान हुने टुंगो छैन । डलरको अभाव भउको समयमा पनि हामीलाई यति सुनको व्यवस्था गरेको उहाँहरु भन्नुहुन्छ । तर पनि यस बारेमा विचार गर्ने राष्ट्र बैंकले बताएको छ ।

दशैंमा राम्रो व्यापार हुने भएतापनि सुनको कमी हुँदा सर्वसाधारणले दिएको अर्डर व्यवसायीहरुले लिन सकिरहेका छैनन् । माग अनुसार सुन भएमा व्यापार राम्रो हुने आशामा बसेका व्यवसायीहरु यतिबेला पर्ख र हेरको अवस्थामा छन् ।