दशैका लागि भदौ २६ गतेदेखि नयाँ नोट सटही गरिने

नुवाकोट । राष्ट्र बैंकले नेपालीहरुको ठूलो पर्व वडादशैका लागि भदौ २६ गतेदेखि नयाँ नोट सटही गर्ने भएको छ । यस वर्ष दशैका लागि १० अर्ब रुपैयाँ बराबरको नयाँ नोट बजारमा पठाउने तयारी गरिएको नेपाल राष्ट्र बैंकले जनाएको छ ।

नेपाल राष्ट्र बैंकले गत वर्षहरुमा जस्तै यस वर्षपनि ५, १०, २०, ५० र १०० सय रुपैयाँका खुद्रा नयाँ र सुकिला नोट  बैंक तथा वित्तीय संस्थाहरुमार्फत सर्वसाधारणलाई सहटी गर्ने तयारी गरेको छ ।

विगतमा राष्ट्र बैंकको बैंकिङ कार्यालयमा र केहि बैंकका शाखाबाट मात्र सटहि सुविधा दिने गरेकोमा भिडभाड भएको गुनासो भएपछि बैंक तथा वित्तीय संस्थामार्फत नै सटही गर्ने केन्द्रीय बैंक स्रोतले जनाएको छ ।

सहकारीका सदस्यहरुका लागि भने राष्ट्रिय सहकारी बैंकमार्फत नयाँ नोट सहटी हुने राष्ट्र बैंकले जनाएको छ  । सहकारी संस्था राष्ट्र बैंक अन्र्तगत नभएकाले सहकारी बैंकबाट नयाँ नोट लिन सक्नेछन् ।

गत वर्ष पनि सहकारी बैंकले राष्ट्र बैंकबाट नयाँ नोट ल्याएर सहकारी संस्थाहरुलाई वितरण गरेको थियो । गत वर्षझै यसवर्ष पनि बैंकले सटहि सुविधा दिने सहकारी बैंकले जनाएको छ । राष्ट्र बैंकले नोट सम्बन्धी औपचारिक निर्णय गर्न भने बाँकी छ ।