प्रहरी सुरक्षामा नुवाकोटको बन्चरेमा फोहोर विसर्जन

नुवाकोट । काठमाडौं महानगरपालिकाले नुवाकोटको बन्चरेडाँडामा प्रहरी परिचालन गरी सोमबार फोहोर विसर्जन गरेको छ ।

काठमाडौं, धादिङ र नुवाकोटका करिब २ सय ५० प्रहरी परिचालन गरिएको थियो । फोहोर व्यवस्थापनलाई सहज बनाउन प्रहरी परिचालन गरिएको नुवाकोटका एसपी रमेश पण्डितले जानकारी दिए । महानगरका अनुसार २ सय ३ गाडी फोहोर विसर्जन गरिएको हो ।

प्रहरी परिचालन गरेर लगिए पनि केही समूहले लुक्दै गुलेली हानेर अवरोध सिर्जना गरेको महानगर प्रमुख बालेन्द्र शाहले फेसबुकमा उल्लेख गरेका छन् । फोहोर व्यवस्थापनमा तत्काल देखिएका समस्या सतही मात्रै भएको भन्दै उनले लेखेका छन्, ‘यसका गहिरा र अलग्गै कारणहरू छन् ।

नत्र सोच्नुहोस् त, राज्यले ५ अर्बभन्दा बढी लगानी गरिसकेको, झन्डै २ दशकदेखि योजना बनाएको ठाउँमा फोहोर लैजान यतिका माथापच्ची किन गर्नुपर्छ ? २०० भन्दा बढी प्रहरी परिचालन गर्दा पनि स्थानीयले लुक्दै गुलेली हान्न सक्ने अवस्था किन बन्छ ? पूरै राज्य संरचना यस्तो निरीह किन बन्छ ?’

सत्तारूढ दलका स्थानीय नेताहरूले नै बन्चरेडाँडामा फोहोर फाल्न नदिने भन्दै आइतबार विज्ञप्ति जारी गरेका थिए । नेपाली कांग्रेस, नेकपा माओवादी केन्द्र र नेकपा एकीकृत समाजवादीाक कार्यकर्ताहरूले सोमबार बिहानैदेखि धुनिबेंसी–१ ढाडेमा फोहोर बोकेका गाडीलाई रोकेका थिए । सोमबार दिउँसो प्रहरी परिचालन गरी अवरोध हटाएर फोहोर विसर्जन गरिएको थियो ।

गत सोमबार राति बन्चरेडाँडा ल्यान्डफिल क्षेत्रमा फोहोर बोकेर गएका गाडीमा तोडफोड भएको थियो । धादिङ र नुवाकोटको सिमाना नजिकै पार्किङ गरेर राखिएका १४ वटा टिपरमा तोडफोड भएको महानगरले जनाएको छ ।