शुशिलको अवको यात्रा कता ?

सन्तोषी अर्याल नुवाकोट । शुशिल अर्थात शान्त स्वभाव । यिनै शान्त स्वभाव भएका शुशिल खड्काको आगामी राजनितिक भविष्य कता मोडिएला भन्ने आम चासो आजभोलि दुप्चेश्वर गाउँपालिका मात्र नभई शिवपुरी, तादी र पन्चकन्या गाउँपालिकामा समेत चल्न थालेको छ ।

गत मंसिरमा सम्पन्न भएको नेपाली कांग्रेसको १४ औ महाधिवेशनबाट नेपाली कांग्रेस क्षेत्र नम्बर १ को प्रदेश (क) को सभापतिमा निर्वाचित भएका खड्काले गत वैशाख ३० गते सम्पन्न भएको स्थानिय निर्वाचनमा पार्टीमा दुख गरेका र क्षमतावान सहकर्मीहरुको योगदानलाई नेपाली कांग्रेसले अवमुल्यन गरेको भन्दै वैशाख १२ गते झण्डै ४ सय ५० भन्दा बढी नेता तथा कार्यकर्ता लिएर एमाले प्रवेश गरेका थिए ।

खड्कासहित दुप्चेश्वर गाउँपालिकाका निर्वतमान अध्यक्ष योविन्द्रसिंह तामाङ पार्टी प्रवेश गरेकोले उनीहरुलाई नेकपा एमालेका अध्यक्ष केपी शर्मा ओलीले फुलमाला लगाएर पार्टी प्रवेश गराएका थिए ।

शुशिलसँगै नेपाली कांग्रेस छाडेका नेता तथा कार्यकर्ताहरुको प्रभावले २०७४ सालमा गाउँपालिका अध्यक्ष र उपाध्यक्षसहित बहुमत कार्यपालिका सदस्य जितेको कांग्रेस यसपटकको स्थानिय निर्वाचनमा दुप्चेश्वरको केही वडामा मात्र सिमित भयो । दुप्चेश्वर गाउँपालिकामा मात्रै नभएर शुशिलको शिपवुरी गाउँपालिका, तादी गाउँपालिका र पन्चकन्या गाउँपालिकामा पनि राम्रो प्रभाव छ ।

कमलो मन भएका शुशिलले दुःख पाएका र गरिव तथा असहायहरुलाई सहयोग गर्न सधैँ जाने हुनाले उनी बालकदेखि बृद्धसम्म परिचित छन् । समाजसेवा सँगसँगै राजनितिमा होमिएका खड्काले समाजसेवालाई प्राथमिकतामा राख्दै आएका छन् ।

सबैमाझ निकै परिचित र संभावना बोकेका नेता भएकोले नेपाली कांग्रेस परित्याग गरेको झण्डै साढे दुई महिना बित्तिसक्दा समेत नेपाली कांग्रेसले उनलाई कारवाही गरेको छैन । उनलाई पार्टीमा फिर्ता ल्याउन नेपाली कांग्रेसका केन्द्रिय नेताहरु लागि परेका छन् ।

उनलाई पुन ः कांग्रेसमा ल्याउन काग्रेसका प्रवत्ता डा. प्रकाशशरण महत, डा. रामशरण महत, केन्द्रिय सदस्य अर्जुननरसिंह केशी, वहादुरसिंह लामा लगायत लागि परेका छन् ।

यस्तै उनलाई एमालेमै टिकाउन एमालेका केन्द्रिय नेतादेखि जिल्ला तहका नेताहरु समेत लागि परेका छन् । एमालेले उनलाई आगामी मंसिरमा हुने भनिएको प्रदेशसभाको निर्वाचनमा प्रदेशसभा सदस्यको लागि टिकट दिने समेत अफर गरिसकेको छ ।

नेपाली कांग्रेस र एमाले दुबै पार्टीको अफरमध्ये शुशिलले कसलाई रोज्लान यसले शुशिलको आगामी यात्रा तय गर्नेछ ।