नुवाकोटको बट्टारमा ‘होटल दियालो’ संचालनमा

नुवाकोट । नुवाकोटको विदुर नगरपालिका वडा नम्बर २ मा सुविधा सम्पन्न होटल दियालो संचालनमा आएको छ ।

शनिवार विदुर नगरपालिकाका मेयर राजन श्रेष्ठले होटल दियालोको उद्घाटन गरेका हुन् । होटलको उद्घाटन कार्यक्रममा बोल्दै नगरप्रमुख श्रेष्ठले नुवाकोटमा ऐतिहासिक, धार्मिक, पर्यटनको संभावना रहेकोले स्थानिय सरकार र होटल व्यवसायी मिलेर पर्यटन प्रर्वद्धन गर्नुपर्ने बताए ।

उनले नुवाकोट त्रिदेशीय राजमार्ग भएकोले पर्यटकहरुलाई आकर्षित गर्नसके पर्यटन प्रर्वद्धनका माध्यमबाट नुवाकोटको आर्थिक विकासमा होटल व्यवसायले उल्लेख्य टेवा पुर्याउने बताए ।

यस्तै कार्यक्रममा बाग्मति प्रदेश होटल तथा पर्यटन व्यवसायी संघका अध्यक्ष सन्तोष उप्रेतीले कोरोनाको कारण जिल्लामा रहेका अधिकांश होटलहरु विस्थापित भएको भन्दै होटल व्यवसायीलाई सरकारले राहात लिनुपर्ने बताए । उनले स्थानिय सरकारको सहकार्यमा जिल्लामा रहेका होटल व्यवसायीहरुले पर्यटन क्षेत्रको प्रर्वद्धन गर्नुपर्ने बताए ।

कार्यक्रममा होटल व्यवसायी संघका केन्द्रिय सदस्य तथा जिल्ला होटल व्यवसायी संघका अध्यक्ष मधुसुदन थपलियाले नुवाकोटमा रहेका धार्मिक सम्पदाहरुको प्रर्वद्धन हुन नसक्दा जिल्लामा आन्तरिक र बाह्य रुपमा पर्यटक आउन नसकेको बताए । उनले स्थानिय सरकार र होटल व्यवसायी मिलेर काम गरेमा सबैले होटल तथा पर्यटनको क्षेत्रबाट मनग्य आयआर्जन गर्न सकिने बताए ।

सेमिनार हल सहितको संचालनमा आएको होटलमा २५ जना भन्दा बढी पाहुना राख्न सकिने संचालक वासुदेव अधिकारीले बताए । होटलमा पार्कीङसहित बार र रेष्टुरेन्ट समेत रहेको छ । अधिकारीले ७ जनालाई रोजगारी दिएर होटल संचालनमा ल्याएको समेत बताएका छन् ।

होटल उद्घाटन कार्यक्रममा विभिन्न सरोकारवाला निकायहरुको उपस्थिति रहेको थियो ।