जाडोले हिटरको व्यापार उच्च

नुवाकोट । चिसो मौसमका कारण बजारमा अत्यधिक रुपमा हिटर बिक्री भएको छ । जाडोबाट बच्नका लागि सबैभन्दा बढी प्रयोग हुने हिटर जाडो मौसम प्रवेश लगत्तै अत्यधिक हिटर बिक्री हुन थालेको हो ।

गर्मी मौसममा अत्यधिकरुपमा फ्यान बिक्री भए जस्तै जाडोको मौसममा हिटर बिक्री हुन्छ । त्यसैले, व्यवसायीहरूले सोहीअनुसार बजारमा सामग्री आयात र बिक्री वितरण गर्दछ । अहिले चिसो मौसम भएका कारण हिटर अत्यधिक रुपमा बिक्री हुन थालेको व्यवसायीहरूको भनाइ छ ।

अनामनगरस्थित रहेको एसएमएस किचन स्टोरका सञ्चालक मिना श्रेष्ठले जाडोका कारण हिटर अत्यधिक बिक्री भएको बताइन् । उनकाअनुसार अन्य वर्षको तुलनामा यो वर्ष बढी भएको छ ।

‘हरेक चिसो मौसममा हिटरको बिक्री हुने गर्दछ,’ उनले क्लिकमाण्डूसँग भनिन्, ‘तर, यो वर्ष विगतको तुलनामा धेरै बिक्री भएको छ ।’

बजारमा सामान्य परिवारलेसमेत जाडोमा हिटर किनेर प्रयोग गर्न सक्ने प्रकारका हिटर उपलब्ध छन् । जसले गर्दा आफ्नो परिवारको आकारको हिसाबले हिटर किन्न सक्ने उनको भनाइ छ ।

उनले विगतको दिनमा दैनिक ७/८ वटा हिटर बिक्री गर्दै आएकोमा यो वर्ष भने दैनिक १० देखि १५ वटा बिक्री भएको जानकारी दिइन् ।

त्यस्तै, शान्तिनगरस्थित साई इलेक्ट्रोनिक्स प्रालिका सञ्चालक गोविन्द केसीले दैनिक २५ वटासम्म हिटर बिक्री भइरहेको बताए । उनले गत वर्ष दैनिक मुस्किलले १५ वटा बिक्री गरेका थिए । अहिले भने हिटर बढी किन्न थालेको उनको भनाइ छ ।

‘मैले जाडो महिना शुरु भएसँगै १ सय वटा हिटर ल्याएको थियो,’ उनले भने, ‘उक्त हिटर केही दिनमै बिक्री भयो ।’

जाडो मौसमको शुरुवातीमा बढी बिक्री भएको हिटर अहिले भने कम हुँदै गएको उनको अनुभव छ ।

त्यस्तै, पहिलो चरणम १ सय वटा हिटर बिक्री गरेको केसीले पुनः १ सय हिटर ल्याएर बिक्री गरेको बताए ।