देशका अधिकांश स्थानमा वर्षा र हिमपात, शुक्रबारसम्म वर्षाकाे सम्भावना

नुवाकोट । बुधबार बिहानदेखि देशका अधिकांश स्थानमा वर्षा भइरहेको छ भने हिमाली भेगमा हिमपात भइरहेको छ ।

मौसम पुर्वानुमान महाशाखाका अनुसार आज राति पनि देशभर बदली रही धेरै स्थानहरूमा हल्कादेखि मध्यम वर्षाको तथा उच्च पहाडी तथा हिमाली भू-भागहरुका धेरै स्थानहरुमा हिमपातकाे सम्भावना रहेको छ ।

हाल देशमा पश्चिमी न्यून चापिय प्रणालीको प्रभाव रहेको महाशाखाले जनाएको छ । देशको पश्चिम तराईका एक वा दुई स्थानमा हुस्सु लागेको र तराईका धेरै स्थानहरूमा हल्का वर्षा भइरहेको छ। काठमाडौं उपत्यकामा अहिले हल्का वर्षा हुँदैछ । काठमाडौंको आज न्यूनतम तापक्रम ७.७ डिग्री सेल्सियस र अधिकतम तापक्रम १०.७ डिग्रीसेल्सियस हुने पुर्वानुमान गरिएको छ । 

उपत्यकाका माथिल्ला भेग चन्दागिरी, फुलचोकी लगायतका स्थानमा पनि हिमपात भइरहेको छ । बुधबार सामाजिक संजालमा मानिसहरु हिउँ खेलेका तस्बिर तथा भिडियो व्यापक रुपमा देखिइरहेको छ ।

वर्षा र हिमपातका कारण जनजीवन प्रभावित भएको छ । देशका केहि स्थानमा टेलिफोन सेवा प्रभावित भएको छ भने यातायात सेवा पनि अवरुद्ध भएको छ । रातिदेखि हिमपात भएका कारण सुदूरपश्चिमका सात पहाडी जिल्ला जोड्ने भीमदत्त राजमार्गको हगुल्टे र साहुखर्क क्षेत्रमा यातायात अवरुद्ध भएको हो जसकारण यात्रुहरु अलपत्र परेका छन् ।