दशैँका लागि काठमाडौँमा च्याङ्ग्रा नआउने

नुवाकोट । खाद्य व्यवस्था तथा व्यापार कम्पनीले दशैँका लागि च्याङ्ग्रा नल्याउने भएको छ ।

हरेक वर्ष काठमडौँ उपत्यकामा खपत गराउन च्याङ्ग्रा ल्याउँदै आएको कम्पनीले यसवर्ष भने नल्याउने भएको हो ।

कम्पनीका नायब महाप्रबन्धक श्रीमणि राज खनालका अनुसार हिमाली जिल्लामै च्याङ्ग्रा महँगो पर्ने भएकाले काठमाडौँ नल्याउने निर्णय गरिएको हो । कोरोनाका कारण यसवर्ष चिनियाँ च्याङग्रा नआउँद्या स्वदेशी च्याङ्ग्रा महँगो भएको कम्पनीको अनुमान छ ।

तिब्बतबाट च्याङ्ग्रा नआउँदा मनाङ र मुस्ताङमा पालिएका च्याङ्ग्राको मूल्य बढेका कारण किन्न नसकिएको कम्पनीले जनाएको छ । मुस्ताङमा अहिलेको च्याङ्ग्राको मासु प्रतिकिलो १ हजारभन्दा बढी छ । 

यसअघि खसीबोका २  हजार र च्याङग्रा १ हजार ल्याउने निर्णय गरेको गरेको खाद्य व्यवस्था तथा व्यापार कम्पनीले अब २ हजार खसीबोका मात्रै ल्याउनेछ ।

मूल्य वृद्धि रोक्न मात्रै खाद्यले खसीबोक ल्याउने गरेको हो । दशैँमा काठमाडौँमा ५० हजार खसीबोका खपत हुने गर्छन् ।