नुवाकोटमा ५७ औं राष्ट्रिय बाल दिवस मनाइयो

नुवाकोट । नुवाकोटमा ५७ औं राष्ट्रिय बाल दिवस विभिन्न कार्यक्रम गरी मनाइएको छ ।

दिवसका अवसर पारेर नेपाल बाल संगठन जिल्ला कार्यसमिति नुवाकोटले आमाको माया छात्रवासलाई खाद्यान्न र बाल मन्दिरमा अध्ययनरत विद्यार्थीहरुलाई स्टेसनरी साामाग्री वितरणका साथसाथै छात्रवृत्ति समेत वितरण गरेको छ ।

दिवसको अवसर पारेर विदुर नगरपालिका वडा नम्बर ७ तुप्चेकी उर्मिला न्यौपानेले आफ्नो व्यत्तिगत सहयोगमा बाल मन्दिर र आमाको माया छात्रवासमा रहेका बालवालिकालाई शैक्षिक सामाग्री उपलब्ध गराएकी छिन् । उनले व्यक्तिगत रुपमा भएपनि केही सहयोग गर्न पाएको भन्दै खुशी व्यक्त गरिन् । साथै आगामी दिनमा सधै सहयोग गर्न तयार रहेको बताइन् ।

कार्यक्रममा बोल्दै नेपाल बाल संगठन जिल्ला कार्यसमिति नुवाकोटका अध्यक्ष राजेन्द्र अर्यालले बालबालिकाको भबिष्यले समाज र देशको भविष्य निर्धारण गर्ने भन्दै सबै बालकालिकाले शिक्षा र स्वास्थ्यको समान अवसर पाउनुपर्ने बताए । उनले कोभिडका कारण सामान्य रुपमा बाल दिवस मनाउनु परेको बताए ।

यस्तै बाल संगठन नुवाकोटका उपाध्यक्ष विन्दा अर्यालले आमाको माया छात्रवास र बाल मन्दिरमा अध्ययनरत बालबालिकाको भविष्य उज्जवल बनाउन अभिभावक र अग्रजहरुले बहुआयामिक रुपमा उनीहरुलाई सही बाटो देखाउनुपर्ने धारणा राखिन् ।
उनले विदुर नगरपालिकालाई बाल मैत्री नगरपालिका बनाउनुपर्ने बताए ।

यस्तै आमाको माया छात्रावासका संचालक सोमप्रसाद पाण्डेले सबै सहयोगी हातहरुको कारण आमाको माया छात्रवासमा रहेका अनाथ तथा असाहय बालबालिकाहरुको दैनिकी संचालन गर्न सहज भएको बताए ।

सरकारले हरेक बर्ष भदौ २९ गतेलाई राष्ट्रिय बाल दिवस घोषणा गरी चेतनामूलक कार्यक्रम सञ्चालन गर्दै आएको छ । हरेक वर्ष बाल दिवस मनाइदै आएपनि बालबालिकाको अवस्थामा खासै सुधार हुन नसकेको गुनासो वालअधिकारकर्मीहरुले गर्ने गरेका छन् ।

कार्यक्रममा बालमन्दिरका पदाधिकारी तथा विभिन्न सरोकारवाला निकायहरुको उपस्थिति रहेको थियो ।