कांग्रेस क्रियाशील सदस्यको नामावली सार्वजनिक हुने

नुवाकोट । जिल्ला सभापतिहरुले क्रियाशील सदस्यको नामावली सार्वजनिक नभए आन्दोलन नै गर्ने भएपछि कांग्रेसले क्रियाशील सदस्यहरुको नामावली सार्वजनिक गर्ने भएको छ ।

सदस्यताका विषयमा देखिएको विवाद मिलेपछि प्राविधिक तयारी पूरा गरी अन्तिम नामावली सार्वजनिक गर्ने जनाएको हो ।सदस्यतालाई पारदर्शी बनाउन माग गर्दै वरिष्ठ नेता रामचन्द्र पौडेल समूहका नेता र जिल्ला सभापतिहरुले सदस्यको नामावली सार्वजनिक गर्न माग गर्दै आएका छन् ।

जिल्ला सभापतिहरुले त क्रियाशील सदस्यताबारे सुसूचित हुन पाउने अधिकारको सम्मान गर्दै सम्पूर्ण सूची सोमबारभित्रै सार्वजनिक गर्न ‘अल्टिमेटम’ दिएका थिए । सोमबारै सदस्यको नामावली सार्वजनिक नभएपछि मंगलबारदेखि केन्द्रीय कार्यालयमा धर्ना दिने उनीहरुको तयारी छ ।

तर, संस्थापन पक्षले भने सदस्यको नामावली सार्वजनिक गर्ने विषयमा धर्ना र आन्दोलन नै हुने भएपछि सदस्यताको विवाद समाधान भएलगत्तै सदस्यको विवरण वेबसाइटमार्फत् सार्वजनिक गर्ने भएको हो ।

‘सदस्यताको विवाद टुंगो लागेपछि सदस्यहरुको विवरण सार्वजनिक गर्छौ‌’, त्यो अन्तिम नामावली हुनेछ,’ स्रोतले भन्यो, ‘त्योसँगै मोबाइल एप समेत सार्वजनिक गर्ने तयारी छ ।’ कांग्रेसले यसअघि छानबिनका क्रममासमेत सदस्यहरुको नामावली सार्वजनिक गरेको थियो ।

यसपटक देशैभरिबाट क्रियाशील सदस्यको विवरण सफ्टवेयरमा इन्ट्री गर्ने व्यवस्था गरिएकाले अन्तिम नामावलीसमेत डिजिटल कपीमै तयार हुनेछ । त्यसैले त्यो सार्वजनिक गर्न समेत सहज हुने स्रोतको भनाइ छ ।

नुवाकोटका जिल्ला सभापति जगदिश्वरनरसिंह केसीले नेतृत्वले क्रियाशील सदस्यताको विवरण सार्वजनिक गर्न आनाकानी गरेको भन्दै मंगलबारदेखि धर्ना दिने कार्यक्रम राखिएको बताए ।

जिल्ला सभापतिहरुले सबै जिल्लाका सभापतिको निर्वाचन प्रक्रियामा एकरूपता आउने गरी निर्वाचन निर्देशिकालाई संशोधन गर्नलगायत माग राखेर धर्ना दिने जनाएका छन् ।