बाग्मति प्रदेशका मुख्यमन्त्रि शाक्य अप्ठेरोमा, सरकार जोगाउन नेपाल समूहमा लाग्नुपर्ने बाध्यता

नुवाकोट । एमाले अध्यक्ष केपी शर्मा ओली पक्षको समर्थनमा गत बुधबार वाग्मती प्रदेशको मुख्यमन्त्री बनेकी अष्ठलक्ष्मी शाक्यलाई एमाले विभाजनका कारण सुरुमै अप्ठेरो अवस्था आइपरेको छ ।

उनले आफ्नो सरकार टिकाइराख्नका लागि माधव नेपाल नेतृत्वको प्रस्तावित नेकपा (एकीकृत समाजवादी) दलको पक्षमा जानुपर्ने अवस्था देखिएको छ । यदि उनी एमालेमै बस्न चाहे प्रदेशसभा भित्र एमालेको एकल बहुमत गुम्ने स्थिति छ । जसका कारण सत्ताबाट बाहिरिनुपर्ने अवस्था आउन सक्छ ।

मुख्यमन्त्री शाक्यमाथि अहिले नेपाल नेतृत्वका दलका सांसद र नेताहरूले आफ्नो पक्षमा खुल्न दबाब दिइरहेका छन् । वाग्मती प्रदेशसभामा हाल १ सय ९ सदस्य छन् । त्यसमा एमालेका सभामुखसहित ५६ जना सांसद छन् । सरकारमा निर्माणमा सभामुखको मत प्रयोग हुँदैन । त्यसैले एमालेको एक जना मात्र संख्या कम हुँदा शाक्य नेतृत्वको सरकार अल्पमतमा पर्छ ।

वााग्मती प्रदेशसभामा यसअघिदेखि नै एमालेको ओली र नेपाल समूहबीच विवाद रहँदै आएको थियो । अहिले पार्टी विभाजनका क्रममा प्रस्तावित दल एकीकृत समाजवादीतर्फ ८ सांसद खुलिसकेको दाबी नेपाल पक्षको छ । सो संख्या शाक्यलाई मुख्यमन्त्री हटाउनका लागि पर्याप्त हो ।

‘अष्ट कमरेड आउनुभएन भने पनि हाम्रोतर्फ यो संख्या कम्तीमा १२ सम्म पुग्ने देखिन्छ,’ नेपाल निकट एक सांसदले भने, ‘नयाँ दल दर्ता भएपछि प्रदेशमा कांग्रेस र माओवादीसहितको गठबन्धन बन्छ ।’ यदि शाक्य आफ्नो पक्षमा नआए शाक्यको स्थानमा राजेन्द्र पाण्डेलाई कांग्रेस र माओवादी केन्द्रको गठबन्धनबाट बनाएर मुख्यमन्त्री बनाउने योजना छ ।

अहिले प्रदेशसभामा पाण्डेका अतिरिक्त मुनु सिग्देल, लक्ष्मण लम्साल, बसुन्धरा हुमागाईं, शान्ति पौडेल, पार्वती सिलवाल र रमा आले मगर नयाँ दलको पक्षमा खुलेका छन् । लामो समयदेखि पूर्वप्रधानमन्त्री माधवकुमार नेपाल पक्षमा रहेकी शाक्य पछिल्लो समयमा पार्टीभित्रको विवाद समाधानका लागि भन्दै तेस्रो धारमा रहेकी छिन् ।

एमाले अध्यक्ष ओलीको निर्देशनपछि डोरमणि पौडेलले मुख्यमन्त्री राजीनामा दिएर शाक्यलाई प्रस्ताव गरेका थिए । एमालेभित्रको समस्याको कारण शाक्य मुख्यमन्त्री बनेदेखि नै उनको कार्यकाल कति समयको हुने भन्ने विषयमा प्रश्न उठ्ने अवस्था आएको छ ।

‘अष्टलक्ष्मी शाक्य केपी शर्मा ओली र माधवकुमार नेपाल दुवैको समर्थनमा अहिले मुख्यमन्त्री बन्नु भएको हो । एमाले विभाजित भएर नयाँ दल दर्ता हुने चरणमा छ । नयाँ दल बनेपछि को कता हुन्छ त्यसपछि मात्रै प्रदेशमा अघि बढ्छ,’ प्रदेशसभाका सांसद लम्सालले भने, ‘ओली पक्षले अहिले आफूले मुख्यमन्त्री बनाएको भनेर प्रचार गर्दैछ । तर ओली पक्षले चाहेको भए अष्टलक्ष्मी शाक्य एक वर्षअघि मुख्यमन्त्री बन्नु हुन्थ्यो ।’

मुख्यमन्त्री शाक्यले शनिबार राजधानीमा ओली पक्षको रामेछाप–काठमाडौं सम्पर्क कमिटीको बैठकलाई सम्बोधन गरेकी थिइन् । सो कार्यक्रममा उनले आफू पार्टी एकताका लागि काम गरिरहेको र ओली नेपाल दुवैको समर्थनमा मुख्यमन्त्री भएको बताएकी थिइन् ।

एकताका लागि भन्दै तेस्रो धार निर्माण गरेको नेपाल समर्थकहरूले मंगलबारसम्ममा १० बुँदे सहमति कार्यान्वयन गर्ने अल्टिमेटम अध्यक्ष ओलीलाई दिएका छन् । उक्त अल्टिमेटम सकिएपछि को नेता कुन धारमा हुन्छन् त्यसपछि वाग्मती प्रदेश सरकारको दिशा पनि तय हुनेछ ।